Xeberle.com-un əldə etdiyi məlumata görə, Sumqayıt şəhər 12 saylı tam orta məktəbin direktoru Abdullayeva Mətanət Çoban qızı və 40 nömrəli məktəbin direktor əvəzi Hümbətəliyev Ramil Azər oğlu işdən azad olunublar.

Məsələ ilə bağlı Sumqayıt şəhər Təhsili Şöbəsinin müdiri Nizami Namazov ilə əlaqə saxladıq.

N.Namazov Xeberle.com-a açıqlamasında xəbərin doğruluğunu təsdiq etdi: "Baxdıq ki, 40 nömrəli məktəbin direktor əvəzi işinə tam uyğunlaşmayıb. Ona görə də ərizə verdi və işdən çıxdı, hazırda isə müəllim kimi fəaliyyət göstərir. Hələlik Təhsil Şöbəsinin inspektorlarından biri - Oqtay Nuriyev bir neçə günlük onu əvəz edir. 12 nömrəli tam orta məktəbin direktoru isə dünən gəldi yanıma və dedi ki, mən demək olar 15 ildən artıqdır ki, işləyirəm. Yorulmuşam, işləməyə səhhətim icazə vermir, təzyiqim və şəkərim qalxır. Ailəmdə də artıq narazılıqlar yaranıb. Ona görə də mən fəaliyyətimi müəllim kimi davam etdirsəm, yaxşıdır. O, bizim ən hörmətli direktorlarımızdan biridir və biz onu işindəki hər hansı bir qüsura görə işdən çıxarmamışıq. Prosedur belədir ki, direktor əvəzinin çıxarılması ilə bağlı əmri mən özüm verə bilərəm. Amma direktorların işə qəbul olması və ya işdən çıxarılması ilə bağlı qərarı birbaşa cənab nazir verir. Biz həmin direktorun ərizəsini məktub ilə birlikdə cənab nazirin sərəncamına göndərmişik. Amma hələ ki, Mətanət xanım direktor kimi fəaliyyət göstərir”.