Xidmət Sahələri üzrə Sumqayıt Dövlət Peşə Təhsil Mərkəzinin nümayəndə heyəti təbliğat-təşviqat kampaniyası çərçivəsində Azərbaycan Təhsil İşçiləri Azad Həmkarlar İttifaqı Sumqayıt şəhər komitəsində olublar.
Xeberle.com xəbər verir ki, Mərkəzin rəhbər - müəllim və tələbələrdən ibarət bir qrup nümayəndə heyəti ATİAHİ-in şəhər komitəsinin sədri Xudaverdi Əliyev ilə görüşüb. Mərkəz tərəfindən Sumqayıt şəhəri üzrə silsilə xarakter daşıyan "Müasir Peşə Təhsili və İnsan Kapitalı" adlı görüş çərçivəsində mərkəzin "Aşpaz" və "Dərzi" ixtisası üzrə təhsil alan tələbələrinin əl işləri təqdim olunub. Görüşün məqsədi Peşə Təhsili və Təliminin (PTT) imicinin yüksəldilməsi, peşə təhsilinin yeni məzmunu, mərkəzin fəaliyyəti, istiqamətləri və qarşıda duran məsələlərlə tanışlıq olmuşdur.
ATİAHİ-in şəhər komitəsinin sədri Xudaverdi Əliyev nümayəndə heyətini salamlayaraq, hər zaman gənclərə dəstək olmağa hazır olduğunu vurğulayıb. Sədr bildirib ki, Azərbaycan dövlətinin təhsilə diqqət və qayğısı ölkədə insan kapitalı kimi çox önəmli milli sərvət yaratmağa hesablanıb.
Mərkəzin direktor müavini Xuraman Zeynalova peşə təhsili və təlimi pilləsinin Dövlət siyasətinin prioritet istiqamətlərindən biri olduğunu vurğulayaraq, dual peşə təhsili və təlimi pilot layihələrinin yaradılması, 2020-2021-ci tədris ilindən etibarən yüksək texniki peşə - subbakalavr səviyyəsinin tədrisinə başlanılması, yeni peşə təhsili müəssisələrinin inşasının PTT-nin inkişafının bariz nümunəsi olduğunu bildirib.
Xuraman Zeynalova 2022/2023-cü tədris ili üzrə mərkəzin qəbul planı, maddi-texniki bazası və buradakı təlim-tədris prosesi haqqında danışıb.
Sonra komitənin sədri Xudaverdi Əliyev tələbələri komitənin fəaliyyəti ilə tanış edərək, onlara gələcək fəaliyyətlərində öz tövsiyələrini verib.
Xəbərdən istifadə edərkən istinad etmək vacibdir.
