ELNUR BAYRAMOV
Tarix müəllimi
Tarixi təcrübə sübut edir ki, müstəqilliyi qoruyub saxlamaq onu qazanmaqdan qat-qat çətindir. Hər bir dövlətin müstəqilliyini şərtləndirən-ədəbiləşdirən amillər, ilk növbədə, konkret şəxsiyyətlərin əməllərində praktik olaraq təcəssümünü tapır.
Çox vaxt politoloqlar rəhbərlərin idarəçilikdə uğursuzluqlarının əsas səbəbi kimi onların idarə etdikləri cəmiyyətin sıravi üzvləri ilə açıq ünsiyyət qura bilməmələri faktını irəli sürürlər. Təbii olaraq bu da idarəçilik məharətinin, liderlik qabiliyyətinin çox aşağı səviyyədə olmasının danılmaz göstəricisidir. Bu kimi insanların ölkə rəhbərliyinə gəlməsi həmin dövlətin inkişafını on illərlə ləngidə bilər, beynəlxalq siyasi arenada nüfuzunu azalda, siyasi təklənməsinə səbəb ola bilər.
Dünyaya yüksək liderlik qabiliyyəti ilə gələn, hər an çalışmaqla özünütəkmilləşdirməyə nail olan, fenomenal hafizə və zəkaya malik olan və dünya liderləri sırasında ən yüksək pillədə duran Heydər Əliyev 1969-cu ildə Azərbaycanda hakimiyyətə gəldi. Ümummilli liderə çevrilən Heydər Əliyev "Dövlət xalq üçündür” prinsipini başlıca şüar edərək qısa müddət ərzində respublikanın elm və təhsil sistemini, mədəniyyətini, sənayesini, kənd təsərrüfatını inkişaf etdirdi. O, Azərbaycanın bütün bölgələrində olduğu kimi əhalinin sosial-mədəni və iqtisadi problemləri ilə şəxsən özü yaxından maraqlanır, vaxtaşırı olaraq xalqın sosial rifahının yaxşılaşdırılması məqsədi ilə sərəncamlar imzalayırdı. Xalqımız ümummilli lideri ilə maneəsiz ünsiyyətə girə bilirdi. Bu isə Heydər Əliyevi digər dünya liderlərindən fərqləndirən çoxsaylı üstünlüklərindən yalnız biridir. Azərbaycanın qədim tarixini bütün həqiqətləri ilə dünyaya çatdırmaqla, sərhədlərinin bütövlüyü uğrunda canlarından keçən şəhidlərini müqəddəs tutmaqla öz xalqının böyük inkişaf yolu keçdiyini sübut etdi, bu torpağın dünyaya onlarla dahi bəxş etdiyini bəyan etməklə bütün dünyanı öz xalqına hörmət etməyə, ona ehtiramla yanaşmağa məcbur etdi.
Hələ keçən əsrin 70-ci illərində rüşvətxorluğa amansız mübarizə elan etməklə gəncliyin əqidəsinə müsbət təsir göstərdi, onların ədalətli cəmiyyət ruhunda tərbiyə almasına şərait yaratdı. Minlərlə istedadlı gənci dünyanın qabaqcıl elm və təhsil ocaqlarında təhsil almalarını təmin etməklə Vətənimizin ixtisaslı kadrlarla zənginləşdirilməsi işini uğurla təşkil etdi, bununla həm də bu ölkələrdə Azərbaycanın ziyalı lobbisinin formalaşması işini həll etmiş oldu.
Ümummilli liderimiz Heydər Əliyev Prezident olduğu 10 il ərzində (1993-2003) 68 dəfə xarici ölkələrə səfər etdi. Bu müddətdə o, gələcəkdə xarici ölkələrdə böyük qüvvəyə çevriləcək Azərbaycan diasporunun özülünü qoymağa başladı, xarici investorların Azərbaycana sərmayə qoymasına etibarlı zəmin yaratdı. Bu yolla Azərbaycan özünə çox böyük dəstək, arxa qazandı.
Türkiyə yazıçısı İrfan Üvnər Nəsrəddin oğlu demişdir: "Heydər Əlirza oğlu Əliyev bütün mənliyi ilə türk oğlu türkdür!". Müdriklərin Heydər Əliyev haqqında dedikləri ulu öndərin daxili dünyasını tam açıqlayır,onun dövlət quruculuğu yolunda çəkdiyi əziyyət dəyərləndirilir. Ulu öndər dünyada ən layiqli lider kimi təbliğ edilir və onun daima yaşar şəxsiyyətinə hörmət və məhəbbət bəslənir.
Hal – hazırda, Azərbaycan cəmiyyətində yaşayan hər bir gənc ümummilli liderimiz olan Heydər Əliyevin təməlini qoyduğu prinsiplər əsasında inkişaf etməklə dövlətimizin də inkişafına dəskət olmağa çalışır.
Azərbaycan Respublikasının bu gününün özülündə Heydər Əliyev ideyası, siyasi və iqtisadi siyasəti durduğunu qətiyyətlə deyə bilərik.
Biz gənclər qətiyyətlə deyə bilərik ki, hal hazırda ölkə rəhbəri cənab İlham Əliyev tərəfindən bu uğurlu siyasət tam sürətlə davam etdirilir. Ölkə üzrə,xüsusilə son zamanlar Sumqayıtda bütün sahələrdə gedən inkişaf buna bariz nümunədir. Bir gənc olaraq biz də bu yolda əlimizdən gələni etməli,cənab prezidentin uğurlu siyasətinə tam dəstək verməliyik.
Xəbərdən istifadə edərkən istinad etmək vacibdir.
