Xəzər Universiteti Sumqayıt Dünya məktəbi Ümummilli Lider Heydər Əliyevin anadan olmasının 100 illik yubileyi münasibətilə şahmat seansı təşkil edib və bu maraqlı yarışı izləmək üçün qapılarını qonaqların üzünə açıb.
Xəzər Universiteti və Dünya məktəbi rəhbərliyi, Sumqayıt Şəhər İcra Hakimiyyətinin rəsmiləri, beynəlxalq qrossmeysterlər, idman ustaları, media və ictimaiyyət nümayəndələri, müəllimlər, valideynlər və şagirdlərin iştirakı ilə baş tutan tədbirin keçirilməsində məqsəd yarım əsr öncə şahmatın möhkəm təməlini qoymuş Ulu Öndər Heydər Əliyevin əziz xatirəsini yad etmək və bu zəka idman növünün zərif ənənəsini şərəflə davam etdirməkdir.
Azərbaycan Respublikasının Dövlət Himninin səsləndirilməsindən sonra Xəzər Universitetinin təsisçisi, Direktorlar və Qəyyumlar Şurasının sədri, professor Hamlet İsaxanlı qonaqları salamlayaraq tədbiri açıq elan edib. Professor çıxışında Heydər Əliyevin hər zaman gənclərə diqqət və qayğı göstərdiyini, təhsilin və idmanın inkişafı ilə bağlı daim məqsədyönlü iş apardığını qeyd edib. Hamlet İsaxanlı qeyd edib ki, Ulu öndər ölkəmizin inkişaf mərhələsində dövlət məktəbləri ilə yanaşı, özəl məktəblərin əhəmiyyətini xüsusilə vurğulayırdı.
Şahmatın inkişafı strategiyası da Ulu öndər tərəfindən həyata keçirilən uğurlu idman siyasətinin tərkibində özünəməxsus yer tutan prioritet məsələlərdən biri idi.
Tədbirdə çıxış edən millət vəkili, Milli Məclisin elm, təhsil və səhiyyə komitəsinin üzvü Müşfiq Məmmədli, Sumqayıt şəhər İcra Hakimiyyətinin rəsmisi Fərman Kazımov, beynəlxalq qrossmeysterlər Azər Mirzəyev, Zeynəb Məmmədyarova, Milli Paralimpiya Komitəsinin vitse-prezidenti, cüdoçu İlham Zəkiyev Ümumilli Liderin ölkəmizdə təhsilin inkişafında əvəzsiz xidmətləri haqqında danışıblar. Qonaqlar Dünya məktəbinin təşəbbüsünü və məramını alqışlayaraq seansın iştirakçısı olan gənc istedadlara uğurlar arzulayıblar.
Xəbərdən istifadə edərkən istinad etmək vacibdir.
