Azərbaycanda şiələr və sünnilər daima dini qardaşlıq şəraitində yaşayıb.
Gün.Az xəbər verir ki, “Qütb TV”nin hazırladığı qısa filmdə şiələr və sünnilər dini ayrı-seçkiliyə yol verməmələri, daima birlik içində yaşamalı və ibadətlərini birlikdə etmələrinə işarə edilib.
Film “Quran-i Kərim”dən “Hucurat” surəsinin 10-cu ayəsi ilə başlayır. Ayədə belə buyurulur:
“Həqiqətən, möminlər (dində) qardaşdırlar. Buna görə də (aralarında bir mübahisə düşsə) iki qardaşınızın arasını düzəldin və Allahdan qorxun ki, bəlkə, (əvvəlki günahlarınız bağışlanıb) rəhm olunasınız!”.
Bu ayədən də göründüyü kimi möminlərin arasında mübahisə və ayrı-seçkiliyin düşməsi bəyənilmir. Onların arasına fitnə-fəsad salmaq istəyənlərin Allahdan qorxmalı olduqları deyilir.
Radikal dini cərəyanların nümayəndələri hər fürsətdə sünni və şiələrin arasına fitnə-fəsad salmaq istəsə də sünni-şiə qardaşlığı hər keçən gün daha da möhkəmlənir. Onlar bir yerdə ibadət edir, bir yerdə həyatlarını bölüşürlər.
Filmin sonunda daha bir ayə göstərilir. Həmin ayədə belə buyurulur:
“Hamılıqla Allahın ipinə (dininə, Qurana) möhkəm sarılın və (firqələrə bölünüb bir-birinizdən) ayrılmayın!” (Ali-İmran surəsi, 103-cü ayə).
Allah bu ayədə açıq-aşkar bildirir ki, müsəlmanlar dini firqələrə bölməməli, sabit olan dinə qulluq etməli və Allahın buyurduğu kimi bir-birindən ayrılmamalıdır.
Xəbərdən istifadə edərkən istinad etmək vacibdir.
