Mayın 5-də Elm və Təhsil Nazirliyi tərəfindən keçirilmiş məktəblilərarası fənn müsabiqələrinin və Lütfi Zadə adına riyaziyyat-məntiq olimpiadasının rayon(şəhər) mərhələsinin nəticələrinə əsasən Abşeron-Xızı Regional Təhsil İdarəsinin tabeliyində fəaliyyət göstərən ümumi təhsil müəssisələrində təhsilalan 219 nəfər şagird final turuna vəsiqə qazanıb.
Abşeron-Xızı Regional Təhsil İdarəsindən Xeberle.com-a verilən məlumata görə, 164 nəfər şagird məktəblilərarası fənn müsabiqələrinin yarımfinal turuna, 55 nəfər isə Lütfi Zadə adına riyaziyyat-məntiq olimpiadasının final turunda iştirak etmək hüququ əldə edib. Sumqayıt şəhərindən məktəblilərarası fənn müsabiqələrinin yarımfinal turuna 141 şagird, Lütfi Zadə adına riyaziyyat-məntiq olimpiadasının final turuna isə 44 şagird vəsiqə qazanıb.
Qeyd edək ki, fənn müsabiqələrində VI sinif şagirdləri riyaziyyat, informatika və təbiət fənləri üzrə, VII sinif şagirdləri isə riyaziyyat, fizika, kimya və biologiya fənləri üzrə iştirak ediblər. Lütfi Zadə riyaziyyat-məntiq olimpiadası isə V sinif şagirdləri arasında təşkil olunub.
Xəbərdən istifadə edərkən istinad etmək vacibdir.
