İqtisadi Zonaların İnkişafı Agentliyinin Peşə Təhsil Mərkəzində "Uşaq hüquqları və Yuvenal ədliyyə” ilə bağlı maarifləndirmə tədbiri keçirilib.
İqtisadi Zonaların İnkişafı Agentliyinin Peşə Təhsil Mərkəzi yanında fəaliyyət göstərən İctimai Şuranın təşəbbüsü ilə 21 oktyabr 2024-cü il tarixində İctimai Şuraya üzv təşkilat olan "Ümidli Gələcək” Sosial Təşəbbüslər İctimai Birliyi tərəfindən "Uşaq hüquqları və Yuvenal ədliyyə” mövzusunda maarifləndirmə tədbiri təşkil edilib.
Xeberle.com məlumat verir ki, tədbirin keçirilməsində əsas məqsəd tələbələrin uşaq hüquqları, sağlam həyat tərzi, yuvenal ədliyyə sistemi, Azərbaycanda fəaliyyət göstərən uşaq müdafiə sistemi və riskli davranışlar haqqında məlumatlandırılması olub.
Tədbirdə çıxış edən Peşə Təhsili Mərkəzinin direktoru Kənan Bağırov uşaq hüquqlarının öyrənilməsinin, riskli davranışlar, eləcə də zərərli vərdişlərdən qorunma və sağlam həyat tərzinin təbliği ilə bağlı məlumatların tələbələrə ötürülməsinin əhəmiyyətini qeyd edib. Daha sonra "Ümidli Gələcək” Sosial Təşəbbüslər İctimai Birliyinin xidmət mərkəzi olan Yuvenal Ədliyyə mərkəzinin psixoloqu Gülşən Axundova və sosial işçisi Elçin Abdullayev tərəfindən uşaqlara maarifləndirici seminar keçirilib. Seminar zamanı uşaqların mövzu barədə məlumatlılığı öyrənilib, tələbələrə Azərbaycan Respublikasının uşaqlara dair qanunvericiliyi, eləcə də yetkinlik yaşına çatmayanların hüquqları, onların müdafiə mexanizmi, yeniyetməlik psixologiyası və riskli davranışlar, eləcə də uşaq qaynar xətt xidməti haqqında ətraflı məlumatlar verilib. Seminarın sonunda uşaqların sualları dinlənilib və interaktiv müzakirələr aparılmaqla cavablandırılıb.
Xəbərdən istifadə edərkən istinad etmək vacibdir.
