Sumqayıt şəhərinin Səməd Vurğun küçəsində, "Metallurq sanatoriyası" adlanan ərazisində yerləşən məcburi köçkünlərin məskunlaşdığı binada acınacaqlı vəziyyət hökm sürür. Sakinlərin sözlərinə görə, bina tamamilə qəzalı vəziyyətdədir.
Bina sakinləri Xeberle.com-a müraciət edərək bildirirlər ki, zirzəmini uzun müddətdir ki, su basıb. Bu, həm pis qoxuya, həm də ağcaqanadların artmasına səbəb olub və nəticədə orada yaşamaq olduqca çətinləşib.
Elektrik sistemləri də demək olar ki, sıradan çıxıb. Şit tez-tez partlayır, saatlarla işıqsız qalmaq halları baş verir. Sakinlər həmçinin su probleminin də olduqca ciddi olduğunu deyirlər.
Sakinlər aidiyyəti qurumlardan xahiş edirlər ki, bu problemlərə dərhal reaksiya verilsin və tədbir görülsün. Onlar illərdir bu şəraitdə yaşamağın artıq dözülməz olduğunu bildirirlər.
Xəbərdən istifadə edərkən istinad etmək vacibdir.
