Peşə Təhsil Mərkəzində “4D Dual TVET” Alman layihəsinin ikinci mərhələsi başlanıb

Tarix: Dünən, 17:20 Oxunma sayı: 50 Bölmə: Təhsil

İqtisadi Zonaların İnkişafı Agentliyinin Peşə Təhsil Mərkəzində "4D Dual TVET” Alman layihəsinin ikinci mərhələsi ilə bağlı təlimə başlanılıb.

İqtisadi Zonaların İnkişafı Agentliyinin nəzdində Peşə Təhsil Mərkəzində 30 yanvar 2025-ci il tarixindən SEQUA vasitəsilə Almaniya Federal İqtisadi Əməkdaşlıq və İnkişaf Nazirliyi tərəfindən maliyyələşdirilən və Bildungswerk der Baden-Württembergischen Wirtschaft e. V. (BiWE) alman təşkilatı tərəfindən həyata keçirilən 4D Dual TVET layihəsi çərçivəsində müəllim-pedaqoji heyət üçün layihənin ikinci mərhələsi ilə bağlı təlimə başlanılıb.

Təlim Almaniya Federativ Respublikasından dəvət edilmiş texniki peşə təhsili sahəsində müstəqil ekspert Ingrid Portenkirchner tərəfindən keçirilir. Təlimdə İqtisadi Zonaların İnkişafı Agentliyinin nəzdində Peşə Təhsil Mərkəzinin əməkdaşları və müəllim-pedaqoji heyəti, Cəlilabad Dövlət Peşə Təhsil Mərkəzinin nümayəndələri və Bildungswerk der Baden-Württembergischen Wirtschaft e. V. (BiWE) alman təşkilatının əməkdaşları iştirak edir. Təlim zamanı "ZSL - Məktəb Keyfiyyəti və Müəllim Təhsili Mərkəzi” Təşkilatının beynəlxalq layihələr üzrə direktoru Konrad Neufeld onlayn formatda təqdimatla çıxış edib. 2 gün davam edəcək təlimdə alternativ enerji və ağıllı kənd təsərrüfatı sahələrində İkili Texniki Peşə Təhsili layihəsinin ikinci mərhələsi üzrə fəaliyyətin təşkili, kurikulumlara baxışın keçirilməsi, layihə resurslarının, əsas göstəricilərin və çətinliklərin qiymətləndirilməsi və qrup işlərinin aparılması nəzərdə tutulub.

2025-2027-ci illəri əhatə edəcək layihənin ikinci mərhələsinin əsas məqsədi alternativ enerji və ağıllı kənd təsərrüfatı sahələrində peşə təhsili və təlimində kadr hazırlığının keyfiyyətini artırmaq və Azərbaycanda peşə təhsilinin inkişafına dəstək verməkdir.