İqtisadi Zonaların İnkişafı Agentliyinin nəzdində Peşə Təhsil Mərkəzi ilə" Caucasus Consulting Group of Companies" şirkəti arasında Anlaşma Memorandumu imzalanıb.
İqtisadi Zonaların İnkişafı Agentliyinin nəzdində Peşə Təhsil Mərkəzi ilə "Caucasus Consulting Group of Companies" şirkəti arasında 04 Fevral 2025-ci il tarixdə əməkdaşlığa dair Anlaşma Memorandumu imzalanıb. Sənədi Peşə Təhsil Mərkəzinin direktoru Kənan Bağırov və "Caucasus Consulting Group of Companies" şirkətinin direktoru Nigar Atabəyli imzalayıb.
Tədbirdə açılış nitqi ilə çıxış edən Mərkəzin direktoru Kənan Bağırov qonaqları salamlayıb, Peşə Təhsil Mərkəzinin fəaliyyəti, həyata keçirilən proqramlar və layihələr, uğurlu əməkdaşlıq istiqamətləri barədə tədbir iştirakçılarına məlumat verib. Tədbirdə çıxış edən şirkətin təsisçisi İsveç Krallığının Chalmers Universitetinin professoru, Massaçusets Texnologiya İnstitutunun müəllimi, "Tərəqqi Medalı” ilə təltif edilmiş, texniki peşə təhsili sahəsində müxtəlif layihələrə rəhbərlik etmiş Bəhram Atabəyli tədbir iştirakçılarını salamlayaraq şirkətin fəaliyyəti haqqında ətraflı məlumat verib. O çıxışı zamanı Azərbaycanda peşə təhsilinin inkişafı istiqamətində son illərdə həyata keçirilən fəaliyyətləri qeyd edib və təhsil müəssisələrinin əmək bazarı ilə əməkdaşlığının inkişaf etdirilməsinin əhəmiyyətini vurğulayıb.
İmzalanan sənədin məqsədi, qarşılıqlı anlaşma əsasında tələbələrin müxtəlif proqramlar üzrə təlimlərə, təcrübə proqramlarına və tədbirlərə cəlb edilməsi, onların işlə təmin olunmasına köməklik göstərilməsi, birgə tədbirlərin təşkili, təhsil alanların bilik və bacarıqlarının davamlı inkişafının təmin edilməsi ilə bağlı layihələrin birgə icrası sahələrində əməkdaşlıqdan ibarətdir. Memoranduma əsasən, Peşə Təhsil Mərkəzində təhsil alan tələbələr və müəllimlər təhsil istiqamətində həyata keçirilən müxtəlif proqramlardan yararlana biləcəklər.
Xəbərdən istifadə edərkən istinad etmək vacibdir.
