Son günlər Sumqayıt şəhərində gecə saatlarında havada yayılan kəskin və xoşagəlməz qoxu sakinlərin narazılığına səbəb olub.
Sakinlərin Xeberle.com-a bildirdiyinə görə, xüsusən axşam saatlarında havada el arasında "qazovka” kimi adlandırılan kimyəvi qoxu duyulur. Onlar iddia edirlər ki, bu qoxu şəhər ərazisində fəaliyyət göstərən sənaye müəssisələrindən, yaxud qanunsuz fəaliyyət göstərən sexlərdən havaya buraxılan tullantılar nəticəsində yaranır.
"Son həftələrin bəzi günlərində pəncərəni açmaq mümkün deyil. Uşaqlar nəfəs almaqda çətinlik çəkir. Qoxu bəzən o qədər güclü olur ki, evdə belə hiss olunur,” – deyə Sumqayıt sakini bildirir.
Digər sakinlər də eyni problemi qeyd edərək, aidiyyəti qurumlardan məsələyə diqqət yetirilməsini tələb edirlər. Onların fikrincə, bu hal artıq mütəmadi xarakter alıb və şəhər sakinlərinin sağlamlığı üçün təhlükə yarada bilər.
Sakinlər ümid edirlər ki, məsələ qısa zamanda həllini tapacaq və şəhərdə havanın keyfiyyəti bərpa olunacaq.
Məsələ ilə bağlı onlar Ekologiya və Təbii Sərvətlər Nazirliyinə müraciət ediblər.
Xəbərdən istifadə edərkən istinad etmək vacibdir.
