Xəbər verdiyimiz kimi, Rusiya Liberal Demokrat Partiyasının sədri Vladimir Jirinovski İrəvanın "Qərbi Ermənistan”ın onlara verilməsi qarşılığında Amerika Birləşmiş Ştatlarına (ABŞ) yardım edəcəyini, ABŞ-ın kürd və ermənilərin vasitəsilə Türkiyəni parçalayacağını qeyd edib. Politoloq Arzu Nağıyev Xeberle.com-a açıqlamasında məsələyə münasibət bildirərək qeyd edib ki, əgər ABŞ-ın belə bir fikri olsaydı, o "Böyük Kürdistan” dövlətinin yaranmasında da maraqlı olardı:

 

"Düşünürəm ki, Nikol Paşinyanın baş nazir seçilməsindən sonra belə məsələlər, problemlər mütəmadi olaraq gündəmə gələcək. Çünki onların dəqiq proqramı olmadığına görə həm regional, həm də qlobal məsələlərdə bu proseslər uzanacaq. Məlum məsələdir ki, Dağlıq Qarabağ münaqişəsi həll olunmayana qədər Türkiyə-Ermənistan münasibətləri düzələ bilməz. Eyni zamanda kürd məsələsinə nəzər yetirəndə Suriyada istifadə olunan bir sıra qruplaşmalar var ki, onların içərisində xristian və yerli kürdlərin də adlarını çəkmək olar. Bu qruplaşmalardan Ermənistan necə faydalana bilər ki?! ABŞ bilir ki, Türkiyə NATO-nun üzvüdür və NATO ilə Rusiyanın sərhədi Ermənistan ərazisindən keçir. Buna görə də o heç vaxt Türkiyəni Ermənistanın ayağına verə bilməz. Qarabağın üçüncü tərəf kimi istifadə məsələsindən də hiss olunur ki, Ermənistanın xarici siyasətdə o qədər də səriştəsi yoxdur. Ona görə də, N.Paşinyanın əvəzinə Levon Ter Petrasyan millətə müraciət etdi. Yəni bu proseslər bütün vəzifələrə təyinat olunana və xarici siyasət aydınlaşdırılana qədər uzana-uzana gedəcək. Regional aktorlar heç vaxt razılıq verməz ki, Ermənistan hər hansı bir sərbəst addım atsın. N.Paşinyan Rusiyaya bağlı adamdır və bugünkü görüşdən sonra hər şey məlum olacaq. Türkiyə Suriyada Afrin əməliyyatları keçirdikləri zaman da ABŞ mane olmadı. Söhbət millətdən və ya millətçilikdən getmir. Əgər ABŞ-ın belə bir fikri olsaydı, o "Böyük Kürdistan” dövlətinin yaranmasında da maraqlı olardı. Amma ABŞ heç ona da razılıq vermədi. Bu, sadəcə olaraq Ermənistanın fikirləşdiyi yeni bir ideyadır”.