Sumqayıt şəhərində yetişən istedadlı məktəblilər ölkəmizin gələcək uğurlarının əsasını qoyur.
Xeberle.com məlumat verir ki,onlardan biri də Sumqayıt şəhər 24 saylı tam orta məktəbin 2-ci sinif şagirdi Bayramlı Əhəd Emin oğludur. Riyaziyyata olan marağı və ilk olimpiada uğuru ilə diqqət çəkən Əhəd artıq yaşıdları arasında seçilir. Xeberle.com-un əməkdaşı gənc olimpiadaçı ilə təhsil yolu, qazandığı uğur və gələcək planları haqqında söhbətləşdib.
– Əhəd, özün haqqında oxucularımıza məlumat verərdin.
– Mən Bayramlı Əhəd Emin oğluyam. Sumqayıt şəhər 24 saylı məktəbdə 2-ci sinifdə oxuyuram. Dərslərimi sevirəm və daim öz üzərimdə çalışmağa çalışıram.
– Riyaziyyata marağın nə vaxt yaranıb?
– Ən çox sevdiyim fənn riyaziyyatdır. Hələ 1-ci sinifdən məntiq tipli testlər həll etməyə başlamışam. Bu tapşırıqlar məni düşündürür və marağımı daha da artırır.
– İlk qazandığın medal hansıdır?
– Müxtəlif onlayn sınaqlarda iştirak etmişəm. Amma ilk dəfə rəsmi olaraq Pifaqor olimpiadasına qatıldım və gümüş medal qazandım. Bu mənim üçün böyük sevinc oldu və məni daha çox həvəsləndirdi.
– Olimpiadalara hazırlaşarkən hansı mövzular sənə daha çətin gəlir?
– Ümumilikdə mövzular mənə rahatdır. Lakin həndəsə və müstəvi fiqurları mövzularında bəzən çətinlik çəkirəm. Buna baxmayaraq, həmin sahələrdə daha çox çalışıram.
– Səncə, uğurun əsas açarı nədir: istedad, yoxsa zəhmət?
– Məncə, hər ikisi vacibdir. Ancaq zəhmət olmadan heç bir uğur qazanmaq mümkün deyil. Çalışmaq hər şeyin əsasını təşkil edir.
– Sumqayıtda yaşamaq və oxumaq sənə nə verir?
– Sumqayıt mənim doğma şəhərimdir. Ailəm, doğmalarım, sinif yoldaşlarım buradadır. Bu mühit mənə özümü rahat hiss etməyə və daha yaxşı oxumağa kömək edir.
– Şəhərdə gənc şagirdlər üçün hansı imkanların artırılmasını istərdin?
– İstərdim ki, Sumqayıtda şahmat məktəbləri daha çox olsun. Şahmat uşaqların məntiqinin inkişafında çox faydalıdır.
– Qazandığın uğurla Sumqayıtı təmsil etdiyini hiss edirsənmi?
– Əlbəttə. Qazandığım medal həm şəhərimi, həm də məktəbimi tanıdır. İnşallah, gələcəkdə daha böyük uğurlarla Sumqayıtın adını yüksəldərəm.
– Sənin nailiyyətlərin digər məktəblilərə necə təsir göstərə bilər?
– Mən özüm həmişə yaxşı oxuyan uşaqlardan motivasiya almışam. Düşünürəm ki, mənim uğurlarım da digər şagirdlər üçün örnək ola bilər.
– Sumqayıtda səni ruhlandıran məkan hansıdır?
– Dərsdən kənar vaxtlarımda əyləncə yerlərinə getməyi sevirəm. Bu, mənə istirahət etməyə və yenidən dərslərə köklənməyə kömək edir.
– Gələcəkdə hansı peşəni seçmək istəyirsən?
– Gələcəkdə həkim olmaq istəyirəm. İnsanları müalicə etmək və onlara kömək etmək mənim ən böyük arzumdur.
– Azərbaycanı və Sumqayıtı beynəlxalq səviyyədə təmsil etmək sənin üçün nə deməkdir?
– Bu, mənim üçün böyük fəxrdir. İnşallah, gələcəkdə də ölkəmi və şəhərimi layiqincə təmsil edərəm.
– Uğur qazanmaq istəyən şagirdlərə nə tövsiyə edərdin?
– Tövsiyəm budur ki, dərslərinə ciddi yanaşsınlar, bilmədikləri mövzuları öyrənsinlər və vaxtlarını səmərəli istifadə etsinlər.
– Özünü 5–10 il sonra harada görürsən?
– Özümü gələcəkdə Tibb Universitetinin tələbəsi kimi görürəm və bu məqsədə çatmaq üçün indidən çalışıram.
Elşən Yəhyayev
Xeberle.com
Xəbərdən istifadə edərkən istinad etmək vacibdir.
