Müdafiə Nazirliyinin açıqladığı rəsmi məlumata görə, Azərbaycan Silahlı Qüvvələrinə Yardım Fonduna bu ilin noyabrın 1-dək 67 milyon 737 min 961,42 manat, 211 min 791.88 ABŞ dolları və 593,69 avro vəsait daxil olub. 

Qeyd edək ki, Fond Azərbaycan Prezidentinin 2002-ci il 17 avqust tarixli 755 saylı fərmanı ilə yaradılıb. Fond Azərbaycan Silahlı Qüvvələrinin müasir tələblər səviyyəsində inkişafını təmin etmək, onun maddi-texniki bazasını möhkəmləndirmək və zəruri sosial tədbirləri maliyyələşdirmək məqsədilə yaradılıb. 

Fondun maliyyə mənbəyi Azərbaycan Silahlı Qüvvələrinin maddi-texniki və sosial bazasının möhkəmləndirilməsinə maliyyə köməyi məqsədilə Azərbaycanın ərazisində fəaliyyət göstərən hüquqi və fiziki şəxslərdən könüllülük əsasında daxil olan maliyyə vəsaiti və qanunvericiliklə qadağan olunmamış digər daxilolmalardır.

Fondun əsas vəzifəsi Azərbaycanın etibarlı müdafiəsi üçün Silahlı Qüvvələrin inkişafını və onun maddi-texniki bazasının möhkəmləndirilməsini, həmçinin hərbi qulluqçuların sosial müdafiəsinin daha da gücləndirilməsini təmin etməkdir.

Hər ay fonda daxil olan vəsaitlərin həcmi mətbuata açıqlanır. Amma bu vəsaitlərin xərclənməsi barədə məlumat verilmir.

Azərbaycan Silahlı Qüvvələrinin Yardım Fonduna yığılan vəsait hara və necə xərclənir?

Milli Məclisin Təhlükəsizlik və Müdafiə komitəsinin üzvü, millət vəkili Zahid Oruc bununla bağlı açıqlamasında bildirib ki, fond yaradılarkən təkcə dövlət resusları hesabına deyil, eləcə də hüquqi və fiziki şəxslər vasitəsilə ordu quruculuğuna kömək göstərilməsi əsas məqsədlərdən sayılırdı. 

Millət vəkilinin sözlərinə görə, dövlət nə qədər imkanlı olsa da, vətəndaşlar yardım fonduna vəsait ayrılmalıdır. O hesab edir ki, yığılan vəsaitlərin xərclənməsi istiqamətləri müxtəlifdir.

"Burada milli borc, mənəvi öhdəliklər deyilən anlayış var. Ola bilsin ki, bu hüquqi öhdəlikdi və yaxud da bunu məcburetmə vasitələrinə çevirmək olmaz. Amma biz dünyanın müxtəlif xalqlarının həyatında belə praktikanı görmüşük. İstəməzdim ki, ermənilərdən misal gətirim. Amma düşmən tərəfi yüz illərdir fondler yaradaraq ianələr və yardım toplayırlar. Əlbəttə Azərbaycanda da buna müəyyən mənada ehtiyac var idi”. 



Deputat hesab edir ki, Azərbaycan Silahlı Qüvvələrinə Yardım Fondu yarananda onun hüquqi sənədləri formalaşıb, amma burada vəsaitin hara xərclənməsi konkret olaraq göstərilməyib.

"Burada hərbçilərin müxtəlif yerlərdə hüquqları uğrunda mübarizə məsələləri nəzərdə tutulurdu. O cümlədən hərbi təyinatlı başqa işlərdə bu vəsaitdən istifadə oluna bilər. Əsasnamədə yazılmayan bir sıra sahələrdə həmin vəsaitlərlə bağlı fəaliyyətin həyata keçirilməsi qeyd olunub. 
İlk vaxtlar yaxşı mənada buna kampaniya halında parlament üzvləri, dövlət strukturlarının əməkdaşları qoşulsa da, sonra dövlətin imkanlarının həddən artıq genişlənməsi, orduya ümumi büdcə vəsaitlərinin 12-14 faizinin ayrılması həmin fondun ictimai resusları cəlbetmə sahəsindəki işi çox da gündəmdə qalmadı. Hazırda açıqlanan rəqəm əslində Azərbaycan xalqının verə biləcəyi vəsaitlər sırasında çox da deyil. Bunu etiraf etmək lazımdır”. 

Millət vəkilinin fikrincə, ordu üçün yığılan vəsaitlərlə tank, top almaq, onu hərbi texnologiyaya və texnikaya cəlb etmək qeyri-mümkündür. Çünki həmin vəsaitin həcmi elə də böyük deyil. 

"Digər tərəfdən hərbi qulluqçuların həyatlarının sığorta olunmasına baxmayaraq, bir sıra hallarda bu sistemi operativ işlədə bilmirik. Belə ki, cəbhədə yaralan hərbi qulluqçuların operativ tibbi yardıma ehtiyacı olur. Bəzən isə bu işin ölkə daxilində deyil, xaricdə həyata keçirilməsi zərurətə çevirilir. Yaxşı xatırlayırıq ki, Qarabağ cəbhəsində döyüşlərdə yaralanmış insanları bəzən təcili qaydada Türkiyəyə göndərməli olurduq. Hospitala gedəcək insanların bu cür fond vasitəsilə maliyyələşməsini düzgün addım olardı”. 

Deputat təklif edir ki, Azərbaycan Silahlı Qüvvələrinə Yardım Fondunun səlahiyyətlərini genişləndirmək lazımdır: "Bu işin müxtəlif tarixi günlərdə daha da genişləndirilməsinə, Dünya Azərbaycanlılarına, xaricdə yaşan soydaşlarımızın bu işə cəlb olunmasına ciddi ehtiyac var. Əsasnamənin dəyişdirilməsi və qeyd etdiyimiz kimi bir sıra hüquqi məsələləri də bura aid etməklə həmin fondu işlək bir mexanizmə çevirmək olar. Artıq orada da xərclərin smetası və cəmiyyətə hesabatın verilməsi də mümkün olar, bu millətimizin xeyrinə işləyər”. (azvision.az)