İşləmək üçün kənd məktəblərini seçən müəllimlərin sayı artıb. Əgər 2 il əvvəl müəllimlərin işə qəbulu üzrə müsabiqəyə müraciət edənlərin sayı 17 min nəfər idisə, 2015-ci ildə onların sayı artaraq, 24 min nəfər olub. Sayın artmasına səbəb də həvəsləndirmə tədbirlərinin tətbiqidir.
Kəpəz TV-nin (Region TV) məlumatına görə, Sumqayıtdan Daşkəsənin kəndinə işləməyə gələn Xatirə Həsənova da belə müəllimlərdəndir. O, dövlətin irəli sürdüyü proqramdan həvəslənərək, işləmək üçün Sumqayıt şəhərindən Daşkəsənin ucqar Xoşbulaq kəndinə gəlib. Artıq iki ildir ki, bu kənddə çalışan Xatirə müəllimənin şagirdlərinə, tədris etdiyi coğrafiya 
fənninin sirlərini öyrətməsi üçün nə uzaq məsafələr, nə soyuq dağ havası, nə də ki, keçilməz yollar əngəl törətmir.
Xatirə Həsənova: "Fikirləşmişəm ki, kənd yerlərində də uşaqların təhsilə marağı olmalıdır. Biz də onların xoş sədalarını eşidib sevinək. Bizə də qayğı göstərilir. Təhsil Nazirliyinin xətti ilə torpaq sahəsi ilə təmin edilməliyik. Düzdür, bunlar hamısı bir gündə olan iş deyil. Amma ən azından gənc kadrların burada qalması üçün planda bu kimi işlər var. Mən də düşünürəm ki, bu dağlarda, bu gözəl uşaqlara ömürlük qalıb müəllimə olum".Elə bu istək uşaqların da ürəyincədir. Çünki iki il ərzində xoşbulaqlı şagirdlər həm Xatirə müəlliməyə, həm də Coğrafiya fənninə böyük məhəbbətlə bağlanıblar.
Daşqın Orucov - şagird: "Xatirə müəllimə çox sadəlövh və gözəldir. Dərsi bizə çox yaxşı izah edir və fənninə qarşı həvəs oyadır".
Aytac Yusifova- şagird: "Müəlliməmizi çox sevirik. Bizim Coğrafiya fənnini öyrənməyə həvəsimiz artıb. Mən də Coğrafiya müəlliməsi olmaq istəyirəm".
Hər bir xalqın xoşbəxtliyi və ya bədbəxtliyi, uşaqların tərbiyəsinin necə qoyulmasından asılıdır. Deməli, dolayısı ilə xoşbəxtliyimiz də bədbəxtliyimiz də müəllimlərdən asılıdır. İnsanı kamilliyə çatdırmaq məqsədi güdən sənət, peşələrin ən şərəflisi olmalıdır. Bu peşənin peşəkarı qadın olanda məqsədlər bir az da aliləşir. Yaradılışda cənnət ayaqlarının altına sərildi, bir az da böyüyüb analıq sevgisi ilə gözəlləşdin, elmi eşidib, öyrənib, yaymağı özünə borc bilib, müəllim oldun, ana oldun, qadın oldun.