Ali məktəblərə təkrar imtahan verən abituriyentlərin nəticələri arasında maraqlı bir ziddiyyət üzə çıxdı. Deməli, bu qəbildən olan abituriyentlərin 86 faizi cəmi 200-ə qədər bal topladıqları halda, 700-ə yaxın bal yığanları da oldu. Bu isə o deməkdir ki, kimlərsə bir il çalışmadı və daha bir il itirdi, kimlər isə səhvlərindən nəticə çıxarıb qaliblər arasında oldu.
Bir neçə gün əvvəl ali təhsil müəssisələrinə əvvəlki illərin məzunları üçün I və IV ixtisas qrupları üzrə keçirilmiş qəbul imtahanı ilə bağlı statistik rəqəmlər açıqlanıb. Məlum olub ki, bu imtahanlarda abituriyentlərdən 10 min 214 nəfəri, yəni 86,33 %-i 0-199 bal arası nəticə göstərib. 32 nəfər 500-599 bal, 98 nəfər 400-499 bal, 368 nəfər 300-399 bal, 1109 nəfəri isə 200-299 bal toplayıb.
İmtahan verənlərin əksəriyyətinin 200-dən aşağı bal toplamasına baxmayaraq, onlar arasında ən yüksək nəticə göstərən abituriyentlər də olub. Sumqayıtda yaşayan Aytac Quliyeva da bu əzmkar abituriyentlər siyahısında birincidir. O, bu imtahanda 690 bal toplayıb.Stomatologiya ixtisasını seçmək istəyən Aytaca 700 balı toplamağa cəmi bir sual mane olub. Ona yenidən hazırlaşmağa ən böyük dəstəyi anası Mətanət Quliyeva göstərib.
Bütün qohumlar da Aytacla fəxr edir. Aytacın yenidən imtahan verənlərə tövsiyəsi də var.
Xəbərdən istifadə edərkən istinad etmək vacibdir.
