Layihəyə uyğun olaraq, iyunun 1-dən etibarən Sumqayıt şəhərində "Sadəcə bir vərəq deməyək” sosial aksiyası keçirilib. Aksiyada Sumqayıt şəhəri üzrə 55 təhsil müəssisəsi iştirak edib.

Bu günaksiya ilə bağlı yekun tədbir keçirilib. Tədbirdə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi tərəfindən İnsan resursları və təlim şöbəsinin müdir müavini Cahangir Hacıyev, Təhsil Nazirliyinin nümayəndəsi Hilal Salmanov, Sumqayıt şəhər Təhsil şöbəsinin Metodkabinetin direktoru Sabir Məmmədov və ”Azərsun” Holdinqin nümayəndəsi Bəxtiyar İsmayılov çıxış edərək həyata keçirilənlayihənin əhəmiyyətindən söz açdılar. Vurğulandı ki, aksiyanın məqsədi ekoloji maarifləndirməyə diqqət çəkmək, kağız israfını azaltmaq və təkrar emalı təşviq etmək yolu ilə ağacların qorunmasına, təbiətin mühafizəsinə və ekoloji balansın saxlanılmasına nail olmaqdır. Qeyd olundu ki, ümumilikdə, aksiya çərçivəsində 40 ton kağız tullantı toplanaraq təkrar emala təhvil verilib.

Sonra aksiyada ən çox fəallıq göstərən təhsil müəssisələrindən 3100 kiloqram kağız tullantı təhvil verən Sumqayıt Təbiət Elmləri Təmayüllü Gimnaziya, 2400 kiloqram kağız tullantı toplayan 14 nömrəli tam orta məktəb, 2200 kiloqram kağız tullantı təhvil verən Texniki və Təbiət Elmləri Liseyi, 2024 kiloqram kağız təhvil verən 6 nömrəli tam orta məktəb və eləcə də digər məktəblər topladıqları kağız tullantılarının miqdarına uyğun olaraq müxtəlif hədiyyələr, diplom, fəxri fərman, təşəkkürnamə ilə mükafatlandırıldılar.