Artıq növbəti tədris ilinin astanasındayıq. Sumqayıt şəhər Təhsil Şöbəsinin yeni mövsümə hazırlıqları və ötən mövsümdə əldə etdiyi nailyyətlər maraq doğrurur. Yeri gəlmişkən, bu günlərdə şəhər təhsil işçilərinin ənənəvi sentyabr konfransı keçirilib. Konfransda ötən tədris ilinin yekunları və yeni tədris ilində qarşıda duran əsas vəzifələr müzakirə olunub. Mövzunun ümumi aktuallığını nəzərə alaraq, Sumqayıt Şəhər Təhsil Şöbəsinin müdiri Nizami Namazovla söhbətləşdik. N.Namazov Sumqayıtda təhsil sahəsində görülən işlər və gələcək planlarla bağlı fikirlərini Xeberle.com-la bölüşüb.

- Nizami müəllim, ötən tədris ili Sumqayıt təhsilində hansı hadisələrlə əlamətdar olub?

- Əsası ümummilli lider Heydər Əliyev tərəfindən qoyulmuş və hazırda ölkə Prezidenti cənab İlham Əliyevin uğurla davam etdirdiyi düşünülmüş, uzaqgörən beynəlxalq, iqtisadi və sosial siyasətin həyatımızın bütün sahələrində, o cümlədən elm və təhsildə tərəqqiyə güclü təkan verib. Ötən müddət Sumqayıtın təhsil işçiləri üçün daha əlamətdar olub. Şəhərin yeni rəhbərliyinin təhsilə qayğısı və tələbkarlığı da bütün pedaqoji kollektivlərin məsuliyyətini artırmaqla, onların fəaliyyətində ciddi dönüş yaradılmasına, nailiyyətlərin daha da artmasına səbəb olub. Ötən mövsümdə bir sıra uğurlarımız olub. Bu dövr ərzində ümumtəhsil məktəblərmizdə 1872 sinif komplektində 47545 şagird təhsil alıb. Bu əvvəlki dərs ili ilə müqayisədə şagird sayının 2000 nəfərdən çox artması deməkdir.

İbtidai təhsil pilləsində (I-IV siniflərdə) 21915 nəfər şagird təhsil alıb. Onlardan 7068 nəfəri dərs ilini "əlaçı”, 9796 nəfəri isə "4” və "5” qiymətlərlə başa vurub.

Ümumi orta təhsil pilləsində (V-IX siniflər) oxuyan 20206 şagirddən 9382 nəfəri dərs ilini "4”, "5” qiymətlərlə, o cümlədən 2154 nəfəri əlaçı kimi başa vurub. 2016-2017-ci dərs ilinin IX sinif məzunları üçün buraxılış imtahanları məzmun və formaca yeni qaydalara əsasən təşkil edilib. Buraxılış imtahanlarının nəticələrinə gəldikdə isə IX sinif üzrə də göstəricilərimizin respublika üzrə ən yaxşılardandır. Şəhər üzrə imtahanda iştirak edən 3671 nəfərdən 3081 nəfəri, yəni iştirakçıların təxminən 84%-i müsbət qiymət ala bilib.

Buraxılış imtanlarının nəticələrində də artım var. 2016-2017-ci dərs ilinin sonunda şəhər üzrə 2600 nəfər XI sinif şagirdi buraxılış imtahanında iştirak etmişdir. Onlardan 2234 nəfəri hər üç imtahan fənnindən müsbət qiymət ala bilib ki, bu da şəhər üzrə müvəffəqiyyət faizinin təxminən 86% olması deməkdir. Ötən illə müqayisədə müvəffəqiyyət faizi 82%-dən 86%-ə qalxmışdır ki, bu da müsbət dinamika hesab edilə bilər.

Azərbaycan Respublikası Təhsil nazirinin 08.06.2017-ci il tarixli 129 nömrəli əmri ilə təsdiq edilmiş "Ümumi orta təhsil haqqında və tam orta təhsil haqqında fərqlənmə attestatlarının verilməsi Qaydası”na əsasən ötən dərs ilində ilk dəfə olaraq XI sinif məzunlarının da fərqlənmə attestatı ilə təltif olunmaq imkan yaranmışdır. Beləliklə 2016-2017-ci dərs ilinin yekununda 103 nəfər XI, 68 nəfər isə IX sinif məzunu fərqlənmə attestatına layiq görülüb.

- Ali məktəblərə qəbul imtahanlarında iştirak edən Sumqayıt məzunlarının göstəriciləri ilə bağlı nə deyə bilərsiniz?

- Sumqayıt məzunları həmişə qəbul imtahanlarında yüksək nəticələri ilə fərqləniblər. Dövlət İmtahan Mərkəzindən alınmış ilkin məlumatlara əsasən 2017-ci ildə Sumqayıt şəhəri ümumtəhsil məktəblərini 2550 nəfər XI sinif şagirdi başa vurmuşdur. Onlardan 2080 nəfəri ali məktəblərə sənəd vermişdir. Göründüyü kimi respublikanın digər bölgələrindən fərqli olaraq şəhərimiz üzrə ali məktəblərə sənədvermə faizi də yüksək – 82%-ə yaxındır.

İlkin təhlillərə əsasən ali məktəblərin I-IV ixtisas qruplarına sənəd verən 2267 nəfərdən 1403 nəfəri, yəni abituriyentlərin təxminən 69%- tələbə adını qazana bilmişdir. Bu ötən il şəhər üzrə qəbul faizi ilə müqayisədə xeyli yüksək olması ilə yanaşı, hesab edirik ki, respublika üzrə ən yüksək göstəricilərdən biridir.

-Bəs şəhər üzrə toplanılan orta bal nə qədər olub?

 

- Qeyd etməliyəm ki, qəbul imtahanları zamanı digər keyfiyyət göstəricilərinin də əvvəlki illərə nisbətən yüksəlməsi müşahidə edilib. Belə ki, şəhər üzrə abituriyentlərin topladıqları orta bal 345,4 bal təşkil edib. Bu şəhərin ötən ilki analoji göstəricisi ilə müqayisədə 55,6 bal və ya 19% çoxdur.İmtahanlarında iştirak edən məzunların (I-IV qruplar üzrə) 411 nəfər, yəni məzunların 22%-i 500-dən, o cümlədən 167 nəfər (2 nəfər "İdrak” liseyi), yəni abituriyentlərin təxminən 9%-i 600-dən yuxarı bal toplaya bilib.

Bildiyiniz kimi, bu il bir yetirməmiz - Təbiət Elmləri Təmayüllü Gimnaziyanın məzunu Eldar Əfəndiyev qəbul imtahanında maksimum nəticə göstərərək 700 bal toplayıb.

- Şagirdlərimizin beynəlxalq, habelə respublika əhəmiyyətli yarış və müsabiqələrdə iştirakını necə qiymətləndirərdiniz?

Ötən dərs ili Sumqayıt təhsilinin, istedadlı şagirdlərimizin bir sıra beynəlxalq və respublika əhəmiyyətli yarış və müsabiqələrdə uğurlu iştirakı ilə də yadda qalıb. Konkret nəticələri sizinlə bölüşmək istərdim. Nazirliyin müvafiq əmrinə uyğun olaraq V-VI sinif şagirdləri arasında riyaziyyat, fizika, kimya və biologiya fənlərindən fənn müsabiqəsi keçirilib. İyun ayının 17-də keçirilən Respublika final mərhələsində ümumtəhsil məktəblərimizi təmsil edən 15 şagird mükafata layiq yerlər tutub, şəhərimiz isə komanda hesabında Respublikada birinci yeri qazanıb. 2016-cı ilin dekabr ayında İndoneziyanın Bali şəhərində keçirilən və dünyanın 48 ölkəsindən məktəblilərin iştirak etdiyi yeniyetmələrin 13-cü Beynəlxalq Elm olimpiadası (İJSO) olimpiadasında Sumqayıt şəhəri Təbiət elmləri təmayüllü gimnaziyanın şagirdi Günel Həsənova, "İstedad” liseyinin şagirdi Şəbnəm Nəbizadə ölkəmizi uğurla təmsil edərək, bu mötəbər bilik yarışının bürünc medallarını qazanıb.

Ənənəvi olaraq keçirilən və dərs ilinin ən yaddaqalan hadisələrindən hesab edilən Respublika fənn olimpiadalarının məktəb turu kütləviliyi ilə seçilib, istedadlı məktəblilərinin obyektiv seçimi təmin edilib. 22 aprel 2017-ci il tarixində keçirilən Respublika final turunda ümumtəhsil məktəblərimizin 21 nəfər şagirdi qalib olub.

15-17 fevral tarixlərində Bakı şəhərində "Sabahın alimləri” VI Respublika müsabiqəsi keçirilmiş, müsabiqənin yekunlarına əsasən şəhərin ümumtəhsil məktəblərindən 6 nəfər IX-XI sinif şagirdi 4 nominasiya üzrə qalib adına layiq görülüb.

Ümummilli lider Heydər Əliyevin anadan olmasının 94-cü ildönümü ilə əlaqədar ümumtəhsil məktəb şagirdləri arasında "Ən yaxşı təqdimat” müsabiqəsinin keçirilməsi barədə təhsil nazirinin əmrinə müvafiq olaraq şəhərin bütün ümumtəhsil məktəblərinin IX-XI sinif şagirdləri arasında Ulu Öndərə həsr olunmuş iki mərhələdən ibarət "Ən yaxşı təqdimat” müsabiqəsi keçirilib. Müsabiqənin final mərhələsində şəhərimizi uğurla təmsil etmiş 5 nömrəli tam orta məktəbin XI sinif şagirdi Qönçə Abbasova III yerə və Təbiət elmləri təmayüllü gimnaziyanın XI sinif şagirdi Aytac Əliyeva isə IV yerə layiq görülüb.

Azərbaycan Uşaqlarının IV Forumu çərçivəsində keçirilən bilik yarışmasında iştirak etmiş Sumqayıt şəhərinin Təbiət elmləri təmayüllü gimnaziya, Texniki və təbiət elmləri liseyi, 11 və 31 nömrəli tam orta məktəbin yuxarı sinif şagirdlərindən ibarət komandası Respublka Final turunda yüksək nəticə göstərərək yarışmanın qalibi olub.

Aprel döyüşləri hərb salnaməmizin əhəmiyyətli əks-hücum əməliyyatları kimi Azərbaycan hərb tarixində şərəfli yer tutur. Bununla bağlı çoxlu sayda tədbirlər keçirilib.

Ötən dərs ilindən başlayaraq təhsilimizdə tətbiq edilən mütərəqqi yeniliklərdən biri də ümumtəhsil məktələrində 5 yaşlı uşaqlar üçün dövlət hesabına məktəbəhazırlığın təşkil olunmasıdır.

- Yeni tədris ilində Sumqayıt təshilində hansı yeniliklər olacaq?

- Sumqayıt Şəhər Təhsil Şöbəsində 2017-2018-ci dərs ilində tam orta təhsil pilləsində tədrisin təmayüllər üzrə təşkili istiqamətində bir sıra işlər görülüb. Növbəti dərs ilindən X siniflərdə təmayül siniflərinin yaradılması üçün son bir neçə ay ərzində məktəblərlə aparılan işlərin nəticəsi olaraq 40 məktəbdə, yəni ümumtəhsil məktəblərinin 83%-dən çoxunda təmayül siniflərinin yaradılması nəzərdə tutulub.

 

13 məktəbdə yalnız təmayül siniflərinin, 27 məktəbdə isə həm təmayül, həm də adi siniflərin açılması planlaşdırılır. Ümumilikdə 87 təmayül sinfi, o cümlədən 32 kombinə edilmiş təmayül siniflərinin fəaliyyətə başlaması nəzərdə tutulub.

Məktəblərin maddi-tədris bazasının möhkəmləndirilməsi, xüsusilə də onların əsaslı təmiri ən vacib məsələlərdəndir. 2005-2016-cı illər ərzində, yəni 11 il ərzində şəhərdə cəmi 16 ümumtəhsil məktəbi əsaslı təmir edilib. Hələ də böyük əksəriyyət məktəblərimizin əsaslı təmir edilməsinə ehtiyac vardır.

Təhsil müəssisələrinin mövcud maddi-tədris bazasının qorunub saxlanmasına ötən dərs ilində daha ciddi diqqət yetirilib, dərs ilinin sonunda istisnasız olaraq bütün məktəblərdə daxili imkanlar hesabına təmir işləri aparılıb.

2015-2016-cı dərs ilində Sumqayıt şəhəri üzrə 4000 nəfərə yaxın müəllim diaqnostik qiymətləndirmədə iştirak edib.

2017-2018-ci dərs ilinin "Ümumi təhsildə keyfiyyət ili” elan edilməsi və bununla bağlı həyata keçiriləcək tədbilər təhsilin inkişafı, şəffaflığı, keyfiyyət və peşəkarlığın yüksəldilməsində öz töhfəsini verəcəkdir.

Azərbaycan Respublikasının təhsil naziri Mikayıl Cabbarovun 31 avqust 2017-ci il tarixli 264 №-li əmri ilə ümumi təhsil müəssisələrində 2017-2018-ci tədris ilinin ilk dərs məşğələsi "Cocuq Mərcanlı-tarixi qayıdışın başlanğıcı” mövzusuna həsr olunacaqdır.

Ramil Zeynallı

Xeberle.com

Xəbərdən istifadə edərkən istinad etmək vacibdir.