Fidan kimi digər şagirdlər də yaş və təcrübələrinin az olmasına baxmayaraq məktəb bufetlərində satılan qidalardan narazı görünürlər. Rastlaşdığımız valideynlər də məktəb bufetlərindəki vəziyyətdən narahatdırlar. Onlar şagirdləri təhsil ocağına göndərərkən çantalarına qəlyənaltı qoymağı məsləhət görürlər. Həkimlərin sözlərinə görə, məktəb bufetlərində satılan qidaların çoxu uşaq orqanizmində ciddi fəsadlara yol aça bilər. Kökəlmə, allergiya, mədə-bağırsaq xəstəlikləri riski qaçılmazdır.
Ekspertlərin fikrincə, məktəb bufetlərindəki acınacaqlı vəziyyət hələ də aktualdır. Çünki onların əksəriyyəti qaydalara cavab vermir. Məktəblərə daxil olan qida həm keyfiyyətli, təhlükəsiz olmalı, həm də müəssisənin texniki vəziyyəti standartlara cavab verməlidir. Sektor müdirinin sözlərinə görə, məktəb yeməkxanalarında standarta uyğun olmayan qidalar satılarsa buna yol verən müəssisə ilə müqavilə ləğv ediləcək. Onu da deyək ki, məktəblərin yeməkxanalarında normativ sənədin tələblərini pozanlara qarşı cərimə nəzərdə tutulur.
Qaydalar və qanunlar gələcəyimiz olan uşaqların sağlamlığına biganə yanaşmır. Məktəb bufetlərinin vəziyyəti, orada satılanlar isə hər kəsin olmasa da, şagird, valideyn və müəllimlərin gözü qabağındadır. Ən azından onların birgə təbliğatı problemin həllinə vəsilə ola bilər.
Xəbərdən istifadə edərkən istinad etmək vacibdir.
