Ümid bircə Dövlət İmtahan Mərkəzinə (DİM) qalmışdı ki, "Tarix” toplusunun yeni nəşrində gedən "müharibə”də bəlkə bir "atəşkəs” əldə edilə. Amma DİM nə etdi?

Qurum yeni "Tarix" test toplusu nəşr etdirdi, nəhayət ki... Gözləntilərimizin əksinə olaraq, bu vəsaitdə heç bir yenilikləri görmədik. Sadəcə kurrikulum sinifləri üçün keçirilmiş sınaq testi "lapet” kimi əlavə edildi və bəh-bəhlə satışa çıxarıldı. Elə ilk test tapşırıqları bölməsinə nəzər yetirəndə gördük ki, bu topluda heç bir dəyişiklik yoxdur, "copy-paste”-dır, vəssalam.

Kiçicik bir fakt: orta məktəb dərsliklərindən çıxarılan 1-ci, 2-ci və 3-cü Pun müharibələrinə aid hadisələr test tapşırıqları kimi yeni topluda bir daha verilib. Xatırladım ki, sadalanan hadisələr kurrikuluma qədərki şagirdlərin "Qədim Dünya Tarixi" dərsliyində verilmişdi. Bundan əvvəlki "Tarix" toplusu kurrikuluma qədərki dərsliklərin proqramına uyğun idi. Bəs indiki toplu?

Nöqtə və vergülünü belə dəyişmədən köhnə vəsaitin yeni topluda verilməsinə nə ad verək? Əksər tarix müəllimləri köhnə topludakı test tapşırıqlarının yeni dərsliklər ilə uzlaşan suallarının saxlanılmasına bir etiraz etmirlər. Lakin dərsliklərdə qeyd olunmayan hadisələri özündə əks etdirən test tapşırıqlarının saxlanılmasını necə izah edək?

İfadəmə görə üzr istəyirəm bu, artıq böyük bir auditoriyanı "barmağına dolamaq"dan başqa bir şey deyil. İndi DİM əsas gətirəcək ki, yeni qəbul sisteminə uyğun test tapşırıqları hələ tam işlənilməyib, hazırlanmayıb. Bunu zatən bizlər də bilirik və anlayışla qəbul edirik. Amma dediyim ki, orta məktəb dərsliklərindən çıxarılan faktlara dayanan tapşırıqları o yeni topludan çıxarmaq bu qədərmi çətindir? Sadəcə word.doc-da həmin test mətnini seçib "delete" düyməsini basmaq lazımdır. Yəni bu qədər sadə.

Halbuki toplunun ərsəyə gəlməsi üçün, yəni köhnə vəsaitdəki vaxtı keçmiş testləri silmək və sistemləşdirmək üçün boğaza qədər zaman var idi. Bəs DİM nə etdi? Qurban dayı demişkən, "işin razqar vaxtında Paşa vurub maşını sındırdı”. Axı ali təhsil məktəblərinə növbəti qəbul üçün hazırlıqların "razqar” vaxtıdır. Abituriyentlər, valideynlər, şagirdlər səbirsizliklə nəsə bir yenilik gözləyirdi. Yenilik isə sadəcə üz qabığının dəyişməsi oldu.

O boyda DİM-də 5-6 tarix müəllimi tapılmadı ki, bu işləri görsün?! Amma müəlliflər heyətinə baxanda və ordakı titulları görəndə adamın gözü qaralır. Və o müəlliflər bildirəcək, əşşi, çıxarılıb lap yaxşı, demək bu ilin abituriyentlərinin qəbuluna düşməyəcək də... yəni adamı borclu çıxaracaqlar. Sən də qalacaqsan gözlərini döyə-döyə.

Bəs yeni dərsliklərə uzlaşmayan tapşırıqlara nə deyəcəksiniz? Əvvəlki dərsliklərdə yaranması Erkən tunc dövrünə aid olan kurqan qəbirləri yeni dərsliklərdə 2 min il sonraya aid edilib, yəni artıq əsaslı dəyişiklik var. Lakin yeni topluda köhnə dərsliklərə əsaslanan kurqan qəbirlərinə aid açıq test tapşırığını olduğu kimi saxlayıblar, hətta cavab yenə də Erkən tunc dövrünə aid olunub. Mən ölüm, müəlliflər, vəziyyət necə idi onda?

Nəysə, işinizdə olun. Əsas odur ki, pul gəlsin.