Ölkənin ilk özəl ali təhsil müəssisəsi olan Qərbi Kaspi Universitetinin Biznes və İqtisadiyyat məktəbi tələbələri üçün növbəti yeniliyə imza atıb.
Belə ki, tələbələrinin praktik biliklərə yiyələnməsinə daim diqqətlə yanaşan universitet bankçılıq sahəsi üzrə də "Unibank"la birlikdə intensiv olaraq praktik məşğələlər, təlimlər, seminarlar təşkil edəcək. 2018-2019-cu tədris ili ərzində "Unibank" ASC-nin müxtəlif departamentlərinin direktorları universitetin Biznes və İqtisadiyyat fakültəsində təhsil alan tələbələr üçün təlimlər keçəcək.
Təlimlər zamanı fəallıqları ilə fərqlənən tələbələr Unibank ASC-də təşkil edilən "Unibankda Qərbi Kaspi Günləri" layihəsi çərçivəsində bankı ziyarət edərək, ixtisasları üzrə müvafiq departament və şöbələrdə praktiki təlimlər keçəcək, bankın idarə heyəti sədri ilə dəyirmi masa arxasında söhbət etmək şansı əldə edəcəklər.
Əməkdaşlıq həmçinin tələbələrin Unibank ASC-də yay məktəbi və təcrübə proqramlarına qatılmaq imkanlarını da nəzərdə tutur.
Qeyd edək ki, ilk təlim artıq 18.12.2018-ci il tarixində baş tutub. Unibank ASC-nin "Təşkilatı inkişaf və İnsan resursları" departamentinin direktoru İlkin Quliyevin "Strategic HRM and Change Management" mövzusunda təlimi təşkil edilib.
Xəbərdən istifadə edərkən istinad etmək vacibdir.
