21 Fevral Beynəlxalq Ana Dili Günü ərəfəsində uşaqların yaxın dostu , görkəmli Azərbaycan yazıçısı, şair, pedaqoq, nasir, filologiya elmlər doktoru, professor Zahid Xəlil Sumqayıt şəhərinin məktəblilərinin qonağı olmuşdur. Azərbaycan dili dərsliklərində bir çox hekayə və şeirlərin müəllifi kimi tanıdıqları, mütaliə etdikləri əsərlərindən heyran olduqları şairi, uşaq ədəbiyyatının canlı əfsanəsi - Zahid Xəlili yaxından görmək, tanımaq, həmsöhbət olmaq şagirdlərdə böyük təəssürat yaratdı. 35 nömrəli tam orta məktəbin müəllim Nigar Vəliyeva, Təfəkkür liseyinin müəllimi Sevinc Əhmədova, 3 nömrəli tam orta məktəbin müəllimi Aygün Səfərlinin və 14 nömrəli tam orta məktəbin müəllimi Əliyeva Ülviyyə müəllimin şagirdləri şairin əsərlərinə maraqlı illüstrasiyalar çəkərək , hekayələrini məharətlə səhnələşdirərək və şeirlərini səsləndirərək ona olan sevgilərini yüksək səviyyədə ifadə etməyə çalışdılar. Dahi yazarın Ana dili günü, doğma dilimizin qədim tarixi, inkişaf yolu barəsində çıxışı, həmçinin görüş haqqında olan təəssüratları, şagirdlərə verdiyi tövsiyə və məsləhətləri, onlara ünvanladığı ürək sözləri yaddaqalan oldu. Görüşün qonaqları- tanınmış şairlər Rafig Yusifoglu və İbrahim İlyaslı, Sumqayıt şəhər Təhsil Şöbəsinin metodisti Cemile Fayyaz, gənc şair Elvin Elizade öz çıxışlarında Azərbaycan uşaq ədəbiyyatında Zahid Xəlilin misilsiz xidmətlərini və təşkil olunmuş görüşün əhəmiyyətini vurğuladılar. Sonda şagirdlər onları maraqlandıran sualları sevimli şairə ünvanlayaraq cavabları maraqla dinlədilər. Əminik ki, bu əlamətdar gündə şagirdlərimizin ana dilinə olan sevgisinin, diqqətin, bilik və bacarığın formalaşmasında əvəzolunmaz rolu olan şeir və hekayələrin müəllifi - Zahid Xəlillə görüş xoş xatirələrlə daima yaddaşlarda qalacaq.
Xəbərdən istifadə edərkən istinad etmək vacibdir.
