Sumqayıtda 31 Mart Azərbaycanlıların Soyqırımı günü ilə əlaqədar tədbir keçirilib. Heydər Əliyev Mərkəzində təşkil edilən anım mərasiminin iştirakçıları əvvəlcə şəhərin orta ümumtəhsil məktəb şagirdlərinin "31 mart - azərbaycanlıların soyqırımı: tarixin qanlı salnaməsi” mövzusunda çəkdikləri rəsm işlərinə baxıblar. Ayrı-ayrı məktəbləri təmsil edən şagirdlər çəkdikləri rəsmlər haqqında tədbir iştirakçılarına ətraflı məlumat veriblər.
Sonra tədbir elmi-praktik konfransla davam edib. Sumqayıt şəhər İcra Hakimiyyəti başçısının birinci müavini Rövşən Sadıxov mərasim iştirakçılarına tariximizin bu qanlı səhifəsi haqqında məlumat verdi. Natiq ermənilər tərəfindən əsrlər boyu xalqımızın başına gətirilən müsibətləri tarixi mənbələrə əsaslanaraq, faktlarla tədbir iştirakçılarının diqqətinə çatdırdı.
Sumqayıt şəhər İcra Hakimiyyəti başçısının müavini Elgin Həbibullayev bu qanlı faciənin hərtərəfli tədqiq olunmasının və dünya ictimaiyyətinə çatdırılmasının vacibliyini qeyd etdi. Vurğulandı ki, 1918-ci ilin mart ayında minlərlə dinc azərbaycanlı əhali yalnız milli mənsubiyyətinə görə ermənilər tərəfindən məhv edilib, evlərə od vurulub, insanlar diri-diri yandırılıb, Bakının böyük bir hissəsini xarabalığa çevirilib. Bakı, Şamaxı, Quba, Qarabağ, Zəngəzur, Naxçıvan, Lənkəran və Azərbaycanın digər ərazilərində xüsusi qəddarlıqla həyata keçirilən soyqırımı erməni ideologiyasının xalqımıza qarşı törətdiyi terror aktı kimi qiymətləndirilib. Bildirildi ki, çirkin niyyətlərindən əl çəkməyən ermənilər sonrakı dövrlərdə bu ərazilərdəki azərbaycanlıların deportasiya edilməsi siyasətini daha da genişləndirmək məqsədi ilə yeni vasitələrə əl atdılar, 1948-53-cü illərdə azərbaycanlıların öz tarixi torpaqlarında kütləvi surətdə deportasiyasına nail oldular. Bununla kifayətlənməyən erməni faşistləri 1988-ci ildən başlayan Dağlıq Qarabağ konfliktinin ilkin mərhələsində minlərlə azərbaycanlının öz tarixi torpaqlarından qovulmasında öz mənfur niyyətlərini bir daha həyata keçirdilər. Çıxışlarda dünya dövlətlərindən və nüfuzlu beynəlxalq təşkilatlardan Azərbaycanlıların soyqırımına hüquqi və siyasi qiymətin verilməsini tələb ediblər. Tədbirin sonunda 31 mart soyqırımına həsr olunmuş film nümayiş olunub.
Tədbirdə YAP Sumqayıt şəhər təşkilatının sədri Asif İmaməliyev, Sumqayıt şəhər Təhsil Şöbəsinin müdiri Vaqif Ələkbərov və digər idarə, müəssisə rəhbərləri iştirak ediblər.