Sumqayıt şəhərində "Gənclərin Daxili İşlər Nazirliyi sistemində təhsilə və xidmətə təşviq edilməsi" mövzusunda tədbir keçirilib.
Xeberle.com xəbər verir ki, görüşdə Daxili İşlər Nazirliyinin Polis Akademiyasının nümayəndəsi, polkovnik-leytenant Eldəniz Kazımov, Sumqayıt şəhər İcra hakimiyyətinin başçısı Zakir Fərəcov, Sumqayıt şəhər Polis İdarəsinin rəisi, polkovnik Fəqan Azadəliyev, Abşeron-Xızı Regional Təhsil İdarəsinin müdiri İlhamə Abdullayeva və ümumi təhsil məktəblərinin IX-XI sinif şagirdləri iştirak ediblər.
Tədbirin keçirilməsində əsas məqsəd yeniyetmə və gənclərimizin təhsilə təşviq edilməsi, sağlam həyat tərzinin təbliği, eləcə də onlarda vətənpərvərlik hissinin daha da yüksəldilməsi olub.
Tədbirdə Polis Akademiyasına kursant qəbulu qaydaları ilə bağlı şagirdlərə ətraflı məlumat verilib. Akademiyada gənclərimizin inkişafı üçün yaradılan müasir şərait, zəngin kitabxanalar, xarici dil kursları, laboratoriyalar, yataqxanalar və asudə vaxtlarının səmərəli təşkili məqsədilə görülən işlərdən danışılıb.
Sonda Polis Akademiyasındakı tədris prosesinə, kursantların hazırlığına həsr edilmiş videoçarx nümayiş olunub.
Xəbərdən istifadə edərkən istinad etmək vacibdir.
