"Vətəndaşlar icbari tibbi sığorta çərçivəsində həkim göndərişi olmadan MRT və KT müayinəsindən yararlana bilməzlər”.
Xeberle.com xəbər verir ki, bunu TƏBİB-in Tibbi sığorta departamentinin rəhbəri Səbinə Quliyeva deyib.
Onun sözlərinə görə, MRT (maqnit-rezonans tomoqrafiyası) və KT (kompüter tomoqrafiyası) müayinəsi üçün vətəndaşlar ixtisaslı həkimə müraciət etməlidirlər:
"Vətəndaş müayinə üçün yaxınlaşdıqda diaqnostika aparılacaq nahiyə, eyni zamanda həkim üçün ilkin məlumat olmadığına görə bu mümkün deyil. Buna görə vətəndaş ilk olaraq ixtisaslı həkimə müraciət edərək göndəriş almalıdır”.
Səbinə Quliyeva qeyd edib ki, özəl tibb müəssisələrinə ən çox radioloji xidmətlər, MRT, KT müayinələri, dar ixtisaslı həkimlər üçün göndərişlər verilir:
"Bununla yanaşı, neyrocərrahlara, ürək-damar cərrahiyyəsi, travmatoloji müayinələr və s. xidmətlərdən yararlanmaq üçün vətəndaşlara özəl tibb müəssisələrinə göndəriş vərəqələri verilir. İcbari Tibbi Sığorta vətəndaşlara həm yüksək səviyyədə, həm də əlçatan xidmət etmək üçün özəl tibb müəssisələri ilə mütəmadi olaraq müqavilə bağlayır”.
Xəbərdən istifadə edərkən istinad etmək vacibdir.
