Azərbaycan Respublikasının Gənclər Fondunun maliyyə dəstəyi ilə Sumqayıt Tələbələri İctimai Birliyi tərəfindən Gənclər Fondunun XVI qrant müsabiqəsi çərçivəsində "Gənc İxtiraçılar Laboratoriyası” layihəsinin sayca beşinci son təlimi keçirilmişdir.
Xeberle.com xəbər verir ki, 07 mart 2023-ci il tarixində Sumqayıt Dövlət Texniki Kollecində keçirilən təlimdə iştirakçıları salamlayan Sumqayıt Tələbələri İctimai Birliyinin idarə heyətinin üzvü Həsən Xıdırov çıxışında ölkəmizdə uğurla həyata keçirilən dövlət gənclər siyasətindən, Gənclər Fondunun və İctimai Birliyin fəaliyyətindən danışmışdır. Bildirilmişdir ki, Gənclər Fondunun maliyyə dəstəyilə həyata keçirilən "Gənc İxtiraçılar Laboratoriyası” layihəsinin məqsədi İKT mühəndisliyi sahəsinə həvəsi olan şagird və tələbələrdən ibarət laboratoriya yaratmaq, robot texnologiyaları, dizayn, kodlaşdırma sahələrinə marağ oyatmaq, bu sahədə təhsillərini davam etdirmək, gələcək karyera və ixtisas seçimlərində yardım göstərməkdir.
Daha sonra beynəlxalq dərəcəli təlimçi Ramil Süleymanov tərəfindən innovasiya və ixtiraçılıq, mühəndislik və kod tədrisi, İKT sahəsində mühəndislik bacarıqları, müasir texnoloji ixtiraçılıq istiqamətində biliklər iştirakçılara çatdırılmış, gəncləri maraqlandıran suallar cavablandırılmışdır.
Təlimdə ümumilikdə 30 gənc iştirak etmiş və onlara sertifikatlar təqdim edilmişdir.
Qeyd edək ki, ümumilikdə isə layihə çərçivəsində 5 təlim keçirilmiş və 150 nəfərdən çox gənc təlimlərə cəlb edilmişdir.
Xəbərdən istifadə edərkən istinad etmək vacibdir.
