Bakıda "Birinci Avropa Oyunlarının hazırlığı və keçirilməsi dövründə qarşıda duran vəzifələr” mövzusunda müşavirə keçirilib. 
Fövqəladə Hallar Nazirliyinin mətbuat xidmətindən verilən məlumata görə, tədbir Bakı Regional Mərkəzi 6 aprel 2015-ci il tarixində Yasamal rayon İcra Hakimiyyəti və Birinci Avropa Oyunları Əməliyyat Komitəsinin (BAOƏK) Təhlükəsizlik Departamentilə birgə keçirilib.
Tədbirdə Yasamal rayon İcra Hakimiyyətinin əməkdaşları, bələdiyyə, hüquq-mühafizə orqanları, təhsil, səhiyyə müəssisələrinin nümayəndələri, təsərrüfat rəhbərləri, Bakı şəhəri üzrə polis və səhiyyə, enerji, qaz və su təchizatı idarələrinin, Birinci Avropa Oyunları Əməliyyat Komitəsi Təhlükəsizlik Departamentinin səlahiyyətli nümayəndələri iştirak ediblər.
Tədbiri giriş sözü ilə açan Yasamal rayon İcra Hakimiyyətinin başçısı İbrahim Mehdiyev Birinci Avropa Oyunları ilə bağlı Yasamal rayonunda aparılan hazırlıq və abadlıq işləri barədə danışılıb. Bu sahədə yerli icra hakimiyyəti və özünüidarəetmə orqanları, eləcə də digər aidiyyəti təşkilatların birgə fəaliyyət istiqamətləri barədə məlumat verilib.
FHN-in Bakı Regional Mərkəzinin rəis müavini Tale Şamçıyev "Birinci Avropa Oyunları ilə bağlı qarşıda duran vəzifələr” mövzusundakı təqdimatında bildirib ki, müşavirənin işçi sənədləri hazırlanarkən, irimiqyaslı idman yarışları keçirmiş bir çox ölkələrin mülki təhlükəsizlik tədbirləri təhlil edilib. Bu təhlillər əsasında fövqəladə hallar, icra və yerli özünüidarəetmə, polis, təhsil, səhiyyə orqanlarının, eləcə də enerji, qaz, su təminatı təşkilatları və s. müəssisələrin birgə mümkün fəaliyyətinin 14 istiqaməti müəyyən edilib.
Natiq bu istiqamətləri bir-bir şərh edərək, aidiyyəti təşkilatlar qarşısında duran ümumi vəzifələrdən danışıb.
BAOƏK-in qrup meneceri Karin Halifa Təhlükəsizlik Departamentinin fəaliyyəti, eləcə də yarışlar zamanı ehtimal olunan potensial təhlükələr, onlara qarşı görülən qabaqlayıcı tədbirlər barədə danışıb.
Müzakirələrdə çıxış edən rayonun idarə və təşkilatlarının rəhbərləri aparılan hazırlıq işləri, mövcud problemlər və onların həlli yolları barədə məlumat veriblər.
Müşavirənin sonunda tədbir iştirakçılarını maraqlandıran suallar cavablandırılıb.  (anspress.com)