Son günlərdə Sumqayıt şəhərində 7 yaşlı uşağın məşqçi tərəfindən döyülərək öldürülməsi gündəmi zəbt edən mövzulardandır. Sözügedən hadisə ilə bağlı güləş üzrə Beynəlxalq turnirlərin mükafatçısı və qalibi, beynəlxalq dərəcəli hakim, Azərbaycanın Əməkdar məşqçisi, idman ustası Xəyal Əliyev Xeberle.com-a açıqlama verərək bildirib ki, ümumiyyətlə 10 yaşa qədər olan uşaqlara hər hansı fənd öyrətmək və göstərmək olmaz.
"10 yaşa qədər olan uşaqlarla məşqlərdə əsasən gimnastik hərəkətlər öyrədilməli və onların bədəninin elastikliyini artırmaq lazımdır. Ona görə də valideynlər uşaqlarını məşqlərə yazdırarkən mütləq şəkildə məşqçinin ixtisası üzrə təhsil alıb-almadığını araşdırmalıdırlar. Həmçinin məşq keçmək uçün lisenziyasının və ya icazəsinin olmasını müəyyən etməlidirlər. O zaman ürək rahatlığı ilə övladlarını məşqçi-müəllimə etibar edə bilərlər", - deyə X.Əliyev qeyd edib.
Xəbərdən istifadə edərkən istinad etmək vacibdir.
