Sumqayıt Şəhər Uşaq Xəstəxanasının yoluxucu xəstəliklər korpusu əsaslı təmirdən sonra istifadəyə verilib. Burada uşaqların müalicə və müayinəsi üçün hər cür şərait yaradılıb.
Xeberle.com AZƏRTAC-a istinadən xəbər verir ki, 1956-cı ildə inşa edilən Sumqayıt Şəhər Uşaq Xəstəxanası 140 çarpayılıqdır. Xəstəxananın 7 şöbəsində 413 tibb işçisi çalışır. Uşaq xəstəxanasının yoluxucu xəstəliklər korpusu son 30 ildə ilk dəfədir təmir olunub. 55 çarpayılıq korpus ən son texnoloji nailiyyətlərə əsaslanan avadanlıq və cihazlarla təchiz edilib. Xəstəxananın əsas korpusunda da cari təmir işləri aparılıb, müasir avadanlıqlar quraşdırılıb. Belə ki, somatik reanimasiya, yeni doğulmuşların patologiyası, pediatriya və cərrahiyyə şöbələri müasir tibb avadanlığı, küvezlər və dərman preparatları ilə təmin olunub.
Yoluxucu xəstəliklər korpusunda görülən işlərlə tanışlıqdan öncə Sumqayıtda fəaliyyət göstərən tibb müəssisələrinin baş həkimləri ilə görüşən şəhər icra hakimiyyətinin başçısı Zakir Fərəcov səhiyyəyə göstərilən dövlət qayğısından danışaraq bildirib ki, ölkəmizdə uğurlu səhiyyə islahatlarının tərkib hissəsi olan tibb müəssisələrinin inşası Azərbaycan dövlətinin vətəndaşlarımızın sağlamlığına verdiyi önəmin təzahürüdür. Bu istiqamətdə Sumqayıtda da mühüm işlər görülüb. Sumqayıtda son bir ildə şəhər 1 nömrəli Doğum Evi, 1 nömrəli poliklinika, 4 nömrəli uşaq poliklinikası, onkoloji dispanser əsaslı təmir olunaraq istifadəyə verilib. Hazırda isə təmirə ehtiyacı olan tibb müəssisələrində təmir işləri aparılır.
Daha sonra şəhər rəhbərliyi və tibb müəssisələrinin nümayəndələri əsaslı təmirdən sonra istifadəyə verilən uşaq xəstəxanasının laboratoriya, fizioterapiya, rentgen, ultrasəs müayinəsi, elektrokardioqrafiya və digər müayinə otaqlarına, həmçinin palatalara baxıblar. Məlumat verilib ki, xəstəxanada istilik sistemi, elektrik avadanlıqları da yenilənib. Tibb ocağının həyəti abadlaşdırılıb, yollara asfalt döşənib, yaşıllıq salınıb, xəstələrin istirahəti üçün zəruri şərait yaradılıb.
Xəbərdən istifadə edərkən istinad etmək vacibdir.
