Bu gün AMEA-nın Nəsimi adına Dilçilik İnstitutunda "Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair” Dövlət Proqramının qəbul olunmasının iki illiyinə həsr olunmuş elmi-praktik konfrans keçirilib. İnstitutun Mətbuat xidmətindən Xeberle.com-a verilən məlumata görə, konfransı giriş sözü ilə açan akademik Tofiq Hacıyev bildirib ki, ana dili hər bir xalqın, milli –mənəvi sərvəti, mənəviyyatının güzgüsüdür.
T.Hacıyev Dövlət Proqramı ilə bağlı məsələlərdən bəhs edib. Qeyd edib ki, Dövlət Proqramı əsasında Dilçilik İnstitutunda Monitorinq şöbəsi yaradılıb. Həmin şöbə bu gün dilin praktik vəziyyəti ilə məşğul olur. Həmçinin Azərbaycan dilinin Dialektoloji Atlasının çapı üçün müəyyən işlər görülür.
Çıxış edən millət vəkili Bəxtiyar Sadıqov dövlətin Azərbaycan dilinə göstərdiyi qayğıdan danışıb.
”Azərbaycan KİV-lərində dil normalarının gözlənilməsi vəziyyəti”ndən bəhs edən B.Sadıqov dilimizi çirklənmədən qorumağın vacibliyini vurğulayıb.
"Azərbaycan dilində terminologiyanın inkişafı: perspektivlər, vəzifələr" mövzusunda məruzə edən professor Sayalı Sadıqova bildirib ki, Azərbaycan dilinin dövlət dili statusu alması, yeni təhsil sisteminin yaradılması prosesində Terminologiya Komissiyasının vəzifələrini daha da artırıb.
Sonda çıxış edən Monitorinq şöbəsinin müdiri, professor Qulu Məhərrəmli Dövlət Proqramının yerinə yetirilməsilə bağlı aparılan monitorinqlər və mövcud problemlərdən söhbət açıb. Monitorinqin yeni sahə olduğunu deyən Q. Məhərrəmli gündəlik dil proseslərini müşahidə etdiklərini diqqətə çatdırıb: "Küçə adlarının monitorinqi ilə bağlı Əmlak Komitəsi ilə bağlı əməkdaşlıq yaratmışıq. Küçə adları tək Bakı şəhəri ilə məhdudlaşmır. Sumqayıt, Gəncə şəhərələri və rayonlar da monitorinqə cəlb olunub.
Q.Məhərrəmli vurğulayıb ki, dildə gedən proseslər mətbuatda aydın görünür: "Yaxşı proseslərlə yanaşı, mənfi meyillər də var. Şifahi nitqdə bunu aydın görmək olur. Başqa dilin intonasiyası ilə danışırlar. Çalışırıq ki, Dilçilik İnstitutunun "Qaynar xətt”ini istifadəyə verək. Qaynar xətt çox düşünülmüş və müasir sistem olmalıdır. Canlı rejimdə dialoq olmalıdır. Bununla yanaşı, biz qrup yaratmışıq. Qaynar xəttin fəaliyyətininin irəliyə aparılmasında mediayaya güvənirik. Azərbaycan dilinin tədrisi ilə bağlı işlər görülməlidir. Azərbaycan dili bağlı verilişlər hazırlanmalıdır. Aparıcılar üçün kurslar təşkil olunmalıdır”.