Tələbə Qəbulu üzrə Dövlət Komissiyası (TQDK) 2014/2015-ci tədris ilində buraxılış imtahanları verəcək məzunlara kömək məqsədilə fənləri üzrə test tapşırıqları nümunələrini təqdim edib. 
Bu il məzun olacaq 9-cu və 11-ci sinif şagirdləri test tapşırıqları nümunələri ilə  buradan tanış ola bilərlər.
TQDK 2015-ci ildə tam orta (11-illik) təhsil səviyyəsi üzrə buraxılış imtahanını ana dili(Azərbaycan bölməsinin şagirdləri üçün - Azərbaycan dili, rus bölməsinin şagirdləri üçün - rus dili fənni), riyaziyyat və xarici dil fənləri üzrə mərkəzləşdirilmiş qaydada keçirəcək ir. Xarici dil fənni tədris edilməyən təhsil müəssisələrinin şagirdləri buraxılış imtahanını xarici dil fənninin əvəzinə kimya fənnindən verəcəklər. Şagirdlərə hər bir fənn üzrə 30, ümumilikdə 90 test tapşırığı təqdim ediləcək. Bundan əlavə, şagirdlər təqdim edilmiş mövzu üzrə yazı işi yerinə yetirəcəklər. Tam orta təhsil səviyyəsi üzrə imtahanın müddəti 2 saat 45 dəqiqədir. Test tapşırıqlarının yerinə yetirilməsinə 2 saat 15 dəqiqə, yazı işinin yerinə yetirilməsinə 30 dəqiqə vaxt ayrılır. 
Ümumi orta (9-cu sinif) təhsil səviyyəsi üzrə imtahanlar isə ana dili və riyaziyyatfənləri üzrə keçiriləcək. Bundan əlavə, şagirdlər təqdim edilmiş mövzu üzrə yazı işiyerinə yetirəcəklər.
Bakı şəhərində yerləşən bütün təhsil müəssisələrində tədris prosesi və imtahan sessiyası bu il mayın 31-nə qədər başa çatdırılacaq.
TQDK əvvəlcədən imtahanların keçirilmə tarixlərini elan edib. İmtahan tarixləri ilə buradan  tanış olmaq mümkündür. (Modern.az)