"Səhnəcikdə səsləndirilən fikirlərin hər birini ssenaristimiz Müşfiq Abbasov real faktlar əsasında, statistikaya əsaslanaraq yazıb".
Bu sözləri Ölkə.Az-a açıqlamasında Əməkdar artist, "Bu şəhərdə"nin aktyoru Rafael İsgəndərov İranla bağlı müzakirələrə səbəb olan səhnəciklə bağlı danışarkən deyib. O, səhnəciyə görə sosial şəbəkələr vasitəsilə hansısa təhdid və ya təhqirlərə məruz qalıb-qalmaması ilə bağlı suala isə belə cavab verib:
"Heç kəs, heç nə deməyib. İranda da mənim nömrəmi bilmirlər (gülür). Orada olanlar hamısı faktlar əsasında yazılıb, camaatı güldürmək üçün yalandan uydurulmayıb.
Biz dövlətimizi dəstəkləyirik. Baxın görək, orada İranın əleyhinə qeyri-adi nə isə varmı? Əgər kimsə fikirləşirsə ki, biz İranı təhqir etmişik, statistikaya baxsınlar. Sərhəddə tutulan İrandan gələn narkotik və yaxud da onların 30 il erməniləri dəstəkləməsi və s. hamısı faktlardır. Sonda səsləndirilən şeirə gəldikdə isə bu da faktdır.
Kimsə deyirsə ki, İrana qarşı düz etməmişik, bilsin ki, hər şeyi reallığa əsaslanır. Özümüzə və Allaha yalan danışa bilmərik", - deyə o söyləyib.
Qeyd edək ki, "Bu şəhərdə”nin Heydər Əliyev Sarayında baş tutan "Əkkiz mart” konsertindən paylaşılan səhnəcik sosial medianın İran seqmentində müzakirələrə səbəb olub.
"Milyonçu şouda iranlı nazir" başlığı ilə "Youtube" platformasına yerləşdirilən səhnəcikdə iranlı nazirə ünvanlanmış suallarda İran-Azərbaycan münasibətlərinin hazırkı durumu yumorla göstərilib.
Xəbərdən istifadə edərkən istinad etmək vacibdir.
