Xeberle.com-un redaksiyasına Yaqubov Rəşad Cahangir oğlu, Nəzərov Etibar Balabəy oğlu, Musayeva Elnarə Şükür qızı və Nəsirova Sədaqət Həqiqət qızı tərəfindən şikayət məktubu ünvanlanıb. Şikayətdə qeyd olunur ki, Sumqayıt şəhərində Mərkəz ləğv edilərək yerində yeni qurum fəaliyyətə başlayandan 18 nəfər işsiz qalıb: "Bizə yeni işlə təmin olunacağımız barədə vədlər verilsə də, hələ də işsiz qalmışıq. Nazirliyə və agentliyə dəfələrlə şikayət etmişik və hər dəfə də bizə boş ümidlər verilib. İndiyədək 18 nəfərdən cəmi 8 nəfəri çox aşağı əmək haqqı müqabilində işlə təmin olunub. Digərləri isə hələ də işsizdir. Qeyd edək ki, himayəsində azyaşlı övladı və yaşlı valideynləri olan həmkarlarımız bu gün bu çətin şəraitdə işsiz qalıb”, - deyə müraciətdə qeyd olunub. 

 

Məsələ ilə bağlı Dövlət Məşğulluq Agentliyinə Xeberle.com tərəfindən sorğu göndərilib. Agentliyin mətbuat katibi Əsmər Nəcməddinqızı bildirib ki, işsiz qaldıqları deyilən vətəndaşlarla bir bir idarə maraqlanıb və araşdırıb: «Qeyd olunan 4 nəfərlə bağlı konkret qərar verilməyib, onların məsələsi hələlik açıqdır. Onlar işdən azad edilmiş hesab edilmirlər, idarə heyəti sədrinin müavinin qəbulunda da olublar. Onlara bildirilib ki, bu məsələ ilə bağlı yaxın vaxtlarda tədbir görüləcək».

Maraqlıdır, dünyada və Azərbaycanda pandemiya şəraitinin davam etməsi, habelə Vətən müharibəsinin zəfəri fonunda işsizlik və məşğulluq məsələlərinin aktuallaşdığı şəraitdə bu  ixtisarlar nə dərəcədə faydalı və gərəklidir? Azərbaycan əhalisi arasında da yoluxmaların sayında kəskin artımı nəzərə alaraq dövlət qurumlarının işçilərinin böyük hissəsi ev şəraitində çalışır. Eyni zamanda onların müvafiq faiz tərkibi xəstələnərək müalicə olunur və belədə müəyyən müddətdə iş tələblərini və vəzifələrini yerinə yetirə bilmirlər. Müstəqil ekspertlərin fikrincə,bu gün şikayət və müraciətlərin artmasının səbəblərindən biri işçilərin zaman və praktik baxımından vəzifələrinin öhdəsindən gələ bilməməsidir. Belə olan halda işçilərin ixtisar olunması xidmətin keyfiyyətini azaltmaqla yanaşı, vətəndaşlar tərəfindən daxil olan şikayətlərin sayını bir az da artırmayacaqmı? Hər halda bu suallar açıq qalır.

Xatırladaq ki, struktur islahatları çərçivəsində DSMF-nin Sumqayıt şəhər şöbəsindən isə 16 nəfər ixtisara düşüb. ƏƏSMN-dən Respublika üzrə 800-ə qədər əməkdaş işindən azad olunub.