Azərbaycanda yüksək vəzifələr tutan məmurların, tanınmış simaların övladları ilə bağlı məlumatlar tez-tez media vasitəsilə gündəmə gəlir, kimisi haqda yaxşı sözlər danışılır, kimisi barədə isə əksinə... Cəmiyyətin bütün təbəqələri kimi, vəzifəli şəxslərin, məşhurların övladları arasında nümunəvi davranışları ilə seçilənlər də var və təbii ki, bunun əksinə olanlar da... Ümumiyyətlə məmurların və məşhurların övladları haqqında bilgilər ictimaiyyətə də həmişə maraqlı gəlib - onlar kimdirlər, harda çalışır, nə işlərlə məşğuldurlar...
Modern.az saytı “Məşhurların övladları” adlı rubrikasında ictimai, siyasi xadimlərin, mədəniyyət, ədəbiyyat, idman və digər sahələrdə tanınmış simaların övladları haqda bilgilərin təqdimatını davam etdirir.
Budəfəki təqdimatımız Bakı şəhərinin keçmiş meri, Azərbaycan Futbol Federasiyaları Assosiasiyasının ilk prezidenti Fuad Musayevin oğlu barədəddir.
Yeri gəlmişkən, 1938-ci il doğumlu Fuad Musayev yanvarın 11-də 76 yaşını qeyd edəcək. O, uzun illər Azərbaycanda rəhbər vəzifələr tutub. 1977-ci ildə Dövlət Planlaşdırma Komitəsində sədrin 1-ci müavini təyin olunub. Elə həmin ildə də Azərbaycan SSR Ali Sovetinin deputatı seçilib və 1995-ci ilə kimi deputat mandatı daşıyıb.
Fuad Musayev 1981-ci ildə Azərbaycan SSR Nazirlər Sovetinin sədr müavini, Mərkəzi Komitənin tikinti üzrə katib vəzifələrində çalışıb.
O, 1983-cü ildən 1988-ci ilə kimi Bakı şəhər Partiya Komitəsinin I katibi vəzifəsində çalışıb.
1990-cı ildə Mərkəzi Komitənin iqtisadiyyat, tikinti və təsərrüfat üzrə katibi olub. Azərbaycan Respublikası müstəqillik əldə edəndən sonra Fuad Musayev Azərbaycan Futbol Federasiyaları Assosiasiyalarının (AFFA) ilk prezidenti seçilib. Uzun müddət AFFA-ya rəhbərlik etmiş Fuad Musayev hazırda təqaüddədir.
Fuad Musayevin 1 oğlu, 1 qızı, 4 nəvəsi var.
Məlumata görə, Fuad Musayevin oğlu Tofiq Musayev Azərbaycan Respublikasını xaricdə təmsil edən diplomatdır.
Tofiq Fuad oğlu Musayev hüquqşünaslıq ixtisasına yiyələndikdən sonra 2003 - 2004-cü illərdə Böyük Britaniyanın tanınmış Esseks Universitetində magistr təhsili alıb. O, 2004 - 2008-ci ollərdə Azərbaycan Xarici İşlər Nazirliyində müxtəlif vəzifələrdə çalışıb. 2008-ci ilin sentyabrından isə Azərbaycan Respublikasının BMT-dəki Daimi Nümayəndəliyinə təyinat alan Tofiq Musayev hazırda da burada çalışır. Peşəkar diplomat olan T.Musayev hazırda Azərbaycanın BMT-dəki daimi nümayəndəsinin müavini vəzifəsini tutur.
Yeri gəlmişkən, Tofiq Musayevin həyat yoldaşı bir vaxtlar Azərbaycanın məşhur şahmatçısı olmuş beynəlxalq qrossmeyster Firuzə Vəlixanlıdır. Onların 3 övladı var: 2 oğlan və 1 qız. 19 yaşlı Ənvər, 14 yaşlı Fuad və 5 yaşlı Kamilla. Cütlük uşaqların ortancılına babası Fuad Musayevin şərəfinə Fuad adı verib.
Ötənlərdə ABŞ mətbuatına verdiyi müsahibəsində Firuzə Vəlixanlıhəyat yoldaşı Tofiqlə İsveçdə tanış olduqlarını bildirmiş və evləndikdən sonra ərinin heç vaxt onun şahmat oynamağına, səfərlərə yollanmağına maneçilik törətmədiyini qeyd etmişdi. O, ev qayğıları, uşaqların tərbiyəsi ilə məşğul olduğunu əsas gətirərək daha şahmata vaxt ayırmağıma imkanının olmadığını bildirib.
Xəbərdən istifadə edərkən istinad etmək vacibdir.
