SOCAR "Azərikimya” İstehsalat Birliyində Ulu Öndər Heydər Əliyevin 100 illiyi münasibətilə Sumqayıt şəhərində yerləşən ümumtəhsil məktəblərinin şagirdləri arasında keçirilən "Mənim Azərbaycanım” adlı rəsm müsabiqəsinə yekun vurulub.
AZƏRTAC xəbər verir ki, Abşeron-Xızı Regional Təhsil İdarəsinin dəstəyi ilə keçirilən müsabiqəyə gənc rəssamlar həvəslə qoşulublar. Bir ay ərzində Sumqayıt şəhəri, o cümlədən Hacı Zeynalabdin, Corat və Saray qəsəbələrində yerləşən orta məktəb şagirdlərinin 63 işi təqdim olunub.
"Azərikimya” İB-nin Baş direktoru İmran Arzumanzadə, Abşeron-Xızı Regional Təhsil İdarəsinin məsləhətçisi Oktay Nuriyev, "Azərikimya” İB-nin Həmkarlar İttifaqı Komitəsinin sədri Aydın Xəlilov, həmçinin Uşaq və yeniyetmələrin Yaradıcılıq Mərkəzinin rəsm müəllimi Xeyransa Cəlili, Əməkdar mədəniyyət işçisi, Azərbaycan Rəssamlar İttifaqının və Beynəlxalq Rəssamlar İttifaqı Fondunun üzvləri Fazil Abbasquluzadə, Mikayıl Abdullayev, AZƏRTAC-ın müxbiri, Əməkdar mədəniyyət işçisi Ətrabə Rzayeva, Əməkdar jurnalist Rafiq Oday, həmçinin "Azərikimya” İB-nin Sosial-inkişaf şöbəsinin böyük mühəndisi Bəxtiyar Musayevin təmsil olunduğu münsiflər heyəti hər rəsmi diqqətlə araşdırıb və ilkin mərhələdə 11 şagirdin işi seçilib. Növbəti mərhələdə fəxri yerlərin sahibləri müəyyənləşib.
Münsiflər heyətinin ümumi rəyi ilə I yerə 11 saylı tam orta məktəbin 7-ci sinif şagirdi Nuray Balamiyeva, II yerə Sumqayıt şəhər 19 saylı tam orta məktəbin 9-cu sinif şagirdi Xədicə Həsənova, III yerlərə isə Sumqayıt şəhər 31 saylı tam orta məktəbin 6-cı sinif şagirdi Elcan Əhmədli, Sumqayıt şəhər 23 saylı tam orta məktəbin 6-cı sinif şagirdi Şəhla Rzazadə və Sumqayıt şəhər 25 saylı tam orta məktəbin 10-cu sinif şagirdi Lalə Məmmədli layiq görülüb. Həmçinin münsiflər heyətinin diqqətini çəkən 6 işin müəlliflərinə fəxri fərman və həvəsləndirici mükafat təqdim olunub.
Təltif olunma tədbirində müsabiqənin qaliblərinə diplomlar və qiymətli hədiyyələr təqdim edilib, onlara yeni yaradıcılıq uğurları arzulanıb.
Xəbərdən istifadə edərkən istinad etmək vacibdir.
