Saytımıza müracət edən 54 yaşlı Sumqayıt sakini Çingiz Əliyev ailəsinin çətinliklərlə yaşadığından və sosial vəziyyətdən şikayətçidir.

 1960-cı ildə İsmayıllı rayonunun Zərgəran kəndində anadan olan Ç. Əliyev ömrünü Sumqayıtla bağlayıb. Şikayətçi deyir ki, 1980-ci ildən 1991-ci ilə qədər Sumqayıt şəhərində Mühafizə İdarəsində nəzarətçi işləyib. 

İki övlad sahibi olan və Qızıl Aypara Cəmiyyətinin üzvlük vəsiqəsini daşıyan Ç. Əliyev 1984-cü ildə “Lenin” mükafatına layiq görülüb. 1992-ci ilin sentyabr ayında isə Ç. Əliyev ruhi xəstəliyə tutulub. Şikayətçi yazır ki, ruhi xəstəliklə əlaqədar olaraq I qrup əlil statusu alıb: “Əlil olmağıma baxmayaraq mənə sosial yardım vermirlər. 3 il əvvəl mənə 82 manat sosial yardım verdilər. Bir ildən sonra 55 manat etdilər. Sonra dedilər ki, sənə sosial yardım düşmür”. 

Sosial vəziyyətin ağırlığından əziyyət çəkən Ç. Əliyev bildirir ki, 148 manat pensiya alır: “Bu isə mənim 4 nəfərdən ibarət olan ailəmin yaşaması üçün kifayət etmir. Dövlət tərəfindən mənə heç bir yardım, heç bir kömək yoxdur. 

Mənimlə heç kim maraqlanmır ki, sən əlilsən qalmısan, yoxsa ölmüsən?”. Üstəlik şikayətçinin problemlərinin üzərinə biri də əlavə olunub: “Həyat yoldaşım da şəkər xəstəsidir. O, hərbi xidmətdən yeni qayıdan oğluna iş tapmaqda da çətinlik çəkir. Deyir ki, hara gedirsə rüşvət istəyirlər: “Oğlum əsgərlikdən yeni qayıdıb.

 Hansı iş üçün maraqlanırsan rüşvət istəyirlər. Bir otaqlı mənzildə yaşayan ailə oğlunun işlə təmin olunması üçün aidiyyatı qurumlardan imdad diləyir.

Türkan Heydərova, xeberle.com