Bildiyiniz kimi, az müddət öncə Sumqayıtın nəqliyyat sistemi şəhər İcra Hakimiyyətinin tabeliyindən alınaraq Azərbaycan Yerüstü Nəqliyyat Agentliyinin (AYNA) tabeliyinə verilib. Xeberle.com saytı olaraq nəqliyyatda davam edən problemləri mütəmadi işıqlandırılmaqla hər kəsi düşündürən suallara dair AYNA-dan açıqlamalar almağa çalışacağıq.
Şəhər sakinlərini narahat edən başlıca problemlərdən biri - ötən il avtobuslarda gediş haqqı ödənişinin kart sisteminə keçirilməsinin nəticəsi ilə bağlıdır. Kart sisteminin təşkil olunmasında yaranan problemdən isə sakinlər zərərlə çıxdı. Bəs bu narazılıqların aradan qaldırılması üçün Agentlik tədbir görəcəkmi?
Qeyd olunan məsələ ilə bağlı AYNA-nın mətbuat katibi Tural Orucov Xeberle.com-a açıqlama verib. Mətbuat katibi bildirib ki, Sumqayıt şəhərinin inzibati ərazisində ümumi istifadədə olan nəqliyyat vasitələri ilə müntəzəm sərnişindaşıma sahəsində tənzimləmə və nəzarət yaxın zamanda AYNA-ya keçib. Onun sözlərinə görə, agentlik köhnədən miras qalan bütün məsələləri mərhələli şəkildə həll etmək niyyətindədir.
"Qeyd edək ki, Sumqayıtda bir müddət tətbiq edilən və texniki səbəbdən baş tutmayan kart sistemi ilə bağlı Agentlik xəbərdardır. Əlavə edək ki, ölkə üzrə sərnişindaşımada nağdsız ödəniş sisteminin sürətləndirilməsi ilə bağlı tapşırıq verilib və işçi qrup yaradılıb. Sumqayıt şəhərində də bu məsələ prioritet hesab olunur. Yaxın zamanda Sumqayıtda nağdsız ödəniş sisteminə keçidlə bağlı işlərə başlanılacaq", - deyə o vurğulayıb.
Aygün İsmayılova
Xəbərdən istifadə edərkən istinad etmək vacibdir.
