Şirvan şəhər Dövlət Arxivində rayonlararası seminar-müşavirə keçirilib. Seminar Azərbaycan Respublikası Dövlət Arxivinin filiallarının və rayon dövlət arxivlərinin rəhbər işçiləri və mütəxəssislərinin ixtisaslarının artırılması məqsədilə keçirilib. Seminarın əsas mövzusu arxivlərdə sənədlərin mühafizəsinin təmin olunması, Milli Arxiv fondunun komplektləşdirilməsi və sənədlərin dəyərinin ekspertizası, idarə arxivlərinin işinə nəzarət, Milli Arxiv fondunun sənədlərindən istifadə edilməsi, Milli Arxiv fondunun elektron daşıyıcılara köçürülməsi və dövlət arxivlərində elektron xidmətin təşkili qaydalarının izah edilməsindən ibarət olub. Milli Arxiv İdarəsinin təşkilatçılığı ilə keçirilən tədbirdə Azərbaycan Respublikası Dövlət Arxivinin Sabirabad, Saatlı, Hacıqabul, Biləsuvar, Neftçala, Cəlilabad rayon arxivlərinin müdirləri, Dövlət Arxivi Salyan filialının direktoru, Milli Arxiv İdarəsinin mütəxəssisləri iştirak edib.
Seminar-müşavirəni Dövlət Arxivi Şirvan filialının direktoru Vaqif Abbasov açıb. O, qonaqları salamlayaraq sözü Milli Arxiv idarəsinin Komplektləşdirmə, İdarə Arxivləri və Karguzarlıq şöbəsinin müdiri Həsən Həsənova verib. Xalqımızın tarixini əks etdirən sənədlərin qorunmasının vacibliyini vurğulayan Həsən müəllim iştirakçılara arxiv işinin təşkili barədə geniş izahatlar verib. Arxivin fəaliyyəti və gələcək planları barədə geniş məlumat verərək arxivçiləri işlərində fəal olmağa dəvət edib.
Milli Arxiv İdarəsinin Sənədlərin nəşri və İstifadə şöbəsinin baş məsləhətçisi Rafiq Səfərov arxiv sənədlərinin tanıdılması, sənədlərdən istifadə etməklə tədbirlərin keçirilməsi, mətbuatda işıqlandırılması kimi işlərin vacibliyini vurğulayıb.
Milli Arxiv idarəsinin Təşkilat Metodika və Beynəlxalq əlaqələr şöbəsinin baş məsləhətçisi Həbib Həsənov iştirakçı olan şəhər və rayon arxivlərinin nümayəndələrinə nümunələr əsasında geniş izahatlar verib.
Milli Arxiv İdarəsinin sənədlərin nəşri və istifadəsi şöbəsinin baş məsləhətçisi Natiq Eminov Arxiv fondlarının elektron daşıyıcılara köçürülməsi sahəsində görülən işlərdən danışıb. Fond siyahılarının yeni qaydalara uyğun elektronlaşmasını xırdalığı ilə izah edərək dünya ölkələrinin bu sahədə olan təcrübəsindən nümunələr gətirib, ölkəmizdə də bu işin yüksək səviyyədə aparılacağına ümid bəslədiyini bildirib.
Sonda seminara ev sahibliyi edən Şirvan şəhər filialının direktoru Vaqif Abbasov çıxış edib. O, bildirib ki, bu gün respublikamızın bütün sahələrdə yüksələn xətt üzrə inkişafı danılmazdır. "Bu inkişafın Arxiv sahəsinə də yansıması gec –tez özünü göstərməlidir. Şəraitsiz arxiv binasının yeni, geniş, işıqlı bina ilə əvəz olunacağı gün yaxındır”.
O, Milli Arxiv İdarəsindən gələn nümayəndələrə öz təşəkkürünü bildirib.
Seminarda iştirak edən digər filial və rayon arxivi rəhbərləri- Salyan şəhər dövlət arxivinin direktoru Səkinə Məlikova, Cəlilabad rayon dövlət arxivinin müdiri Toğrul İsgəndərov, Biləsuvar rayon dövlət arxivinin müdiri Ağayar Əzizov, Neftçala rayon dövlət arxivinin müdiri Vidadi Həmzəyev , Sabirabad rayon dövlət arxivinin müdiri İbrahim Abbasov, Hacıqabul rayon dövlət arxivinin müdiri Nadir Səmədov , Saatlı rayon dövlət arxivinin müdiri Gülağa Abışov çıxış edərək Milli Arxiv idarəsinin rəhbərliyinə onların ixtisaslarının artırılması məqsədilə belə bir tədbirin təşkil edilməsinə təşəbbüs göstərdiyi üçün öz təşəkkürlərini bildirib. Seminardan məmnun qalan personalımız bu cür seminarların mütamadi keçirilməsinin vacibliyini vurğulayıb.

Qeyd edək ki, belə seminarlar əvvəllər Milli Arxiv idarəsində təşkil olunurdu. Ilk dəfə olaraq regionda, məhz Şirvan şəhərində baş tutub.

Nəsibə Nəsib qızı
Xeberle.com