Xeberle.com xəbər verir ki, "Qadın Təşəbbüsü və Sosial Problemlerin Həllinə Yardım İctimai Birliyi”nin  təşkilatçılığı ilə keçirilən müzakirədə Sumqayıt şəhər İcra Hakimiyyəti başçısının müavini, icra hakimiyyəti yanında gender zorakılığı və uşaqlara qarşı zorakılıq hallarının qarşısının alınması məqsədi ilə yaradılan monitorinq qrupunun sədri Ülviyyə Müzəffərova da iştirak edib.

Şəhərdə fəaliyyət göstərən müxtəlif dövlət qurumlarının nümayəndələrinin qatıldığı tədbirdə Sumqayıt şəhər İcra Hakimiyyəti başçısının müavini Ülviyyə Müzəffərova  çıxış edərək bu kimi müzakirələrin keçirilməsini yüksək qiymətləndirib.  Ü. Müzəffərova ölkəmizdə insan alveri və məişət zorakılığına qarşı mübarizə, zorakılığın səbəb olduğu mənfi hüquqi və sosial nəticələrin qarşısının alınması,  zərərçəkmiş şəxslərin sosial müdafiəsi istiqamətindən həyata keçirilən tədbirlərdən danışıb. Habelə məişət zorakılığına səbəb olan halların aradan qaldırılması istiqamətində cəmiyyəti maarifləndirilməsinin vacibliyi vurğulanıb.

"Qadın Təşəbbüsü və Sosial Problemlerin Həllinə Yardım İctimai Birliyi”nin sədri Zenfira Mustafayeva və digər çıxış edənlər insan alveri və məişət zorakılığnını bəşəriyyətin ən böyük problemlərindən olduğunu diqqətə çatdırıblar.  Qeyd olunub ki, məişət zorakılığın qarşısının alınması insanların təhlükəsizliyin təmin olunmasında böyük əhəmiyyət kəsb edir.

İctimaiyyətdə geniş maarifləndirmə işlərinin aparılmasının vacibliyi vurğulanıb və bu istiqamətdə birgə fəaliyyətin zəruriliyindən söz açılıb.

Müzakirə qarşılıqlı fikir mübadiləsi ilə yekunlaşıb.