Bir müddətdir ki, Sumqayıt şəhər sakinləri axşam saatlarında restoranlardan, şadlıq saraylarından çıxan tüstüdən narahat olduqları ilə bağlı şikayətlər ünvanlayırlar. Yaşlı sakinlər bildirirlər ki, restoranların tüstüsü o qədər boğucu olur ki, hətta açıq havada gəzmək müşkülə çevrilir.
Sakinlərin əksəriyyəti 18-ci mkr.-da yerləşən "Aylı Gecə" şadlıq sarayındakı tüstü və qoxudan təngə gəldiklərini qeyd edirlər.
Məsələ ilə bağlı Xeberle.com olaraq Azərbaycan Respublikası Ekologiya və Təbii Sərvətlər Nazirliyinə müraciət etdik. Nazirliyin mətbuat katibi İradə İbrahimova bildirdi ki, Məhərrəm ayından öncə əməkdaşlarımız tərəfindən ictimai-iaşə obyektlərində, o cümlədən sözügedən "Aylı Gecə" şadlıq sarayında da monitorinq keçirilib və ölçmə işləri aparılıb. Aparılan monitorinq və ölçmə işləri zamanı "Aylı Gecə" şadlıq sarayından atmosferə atılan tullantıların norma daxilində olduğu müəyyən edilib.
""Aylı Gecə” şadlıq sarayında təmizləyici qurğu var, lakin ola bilər ki, qurğunun filtri vaxtı-vaxtında dəyişdirilmədiyindən atmosferə tüstü yayılıb”.
Mətbuat katibi qeyd edib ki, əksər obyektlərdə təmizləyici qurğular quraşdırılsa da, təəssüf ki, onlara vaxtında texniki xidmət göstərilmədiyindən, filtrlər vaxtaşırı təmizlənmədiyindən havaya tüstü və iy-qoxu yayılır. Sözügedən şadlıq sarayında təkrar monitorinq keçiriləcək", - deyə o fikrini tamamlayıb.
Aygün İsmayılova
Xəbərdən istifadə edərkən istinad etmək vacibdir.
