21-22 aprel 2015-ci il tarixlərində Xaçmaz rayonunda N. saylı hərbi hissədə Xaçmaz rayon Gənclər və İdman İdarəsinin təşkilatçılığı ilə "Şahin” Respublika hərbi-idman oyununun zona birinciliyi keçirilmişdir.
Yarışın rəsmi açılış hissəsində Azərbaycan Respublikası Gənclər və İdman Nazirliyi Gənclərlə iş şöbəsinin Vətənpərvərlik və vətəndaşlıq tərbiyəsi sektorunun baş məslətçisi Elçin Nəcəfov iştirak və çıxış etmişdir.

Quba-Xaçmaz zonası üzrə yarışda Sumqayıt şəhərinin, Quba, Qusar, Abşeron, Şabran, Siyəzən və Qubadlı rayonlarının ümumtəhsil məktəblərinin VIII və X sinif şagirdlərindən ibarət komandaları iştirak etmişdir. Sumqayıt şəhərini Gənclər və İdman Baş İdarəsinin rəhbərliyi ilə Təbiət Elmləri Təmayüllü Gimnaziyanın "Şahin”ləri təmsil etmişlər.

Məktəblilər "sıra hazırlığı”, "darağa patronun doldurulması və boşaldılması”, "avtomatın sökülməsi və yığılması”, "tüfəngdən hədəfə atəş açmaq” və digər mərhələlər üzrə yarışmışlar.

Gərgin mübarizədən sonra yarışın nəticələrinə əsasən Təbiət Elmləri Təmayüllü Gimnaziyanın komandası I yerə layiq görülərək  "Şahin” hərbi-idman oyununun C.Naxçıvanski adına Hərbi Liseydə keçiriləcək Respublika finalında iştirak hüququ qazanmışdır.