Müsavat Partiyası başqanının həbsdə olan müavini Tofiq Yaqublunun qızı Nərgiz Yaqublu vəfat edib.
Bu barədə Milli Strateji Düşüncə Mərkəzinin sədri, Müsavat Partiyasının keçmiş başqanı İsa Qəmbər məlumat verib.
"Dünya və biz bu gözəlliyi itirdik Tanrı ruhunu şad eləsin”,-deyə İsa Qəmbər bildirib.
Qeyd edək ki, Nərgiz Yaqublu ötən il ailə qurub, Rusiyada yaşayırdı. Ailə qurmazdan öncə "Yeni Müsavat" qəzetində çalışıb. O, sarılıq xəstəliyindən (Hepatit C) əziyyət çəkirdi və Tomsk şəhərindəki xəstəxanaların birində müalicə alırdı. Mərhum ana olmağa hazırlaşırdı...
Allah rəhmət eləsin...
Nərgiz Yaqublunun atası, Müsavat Partiyası başqanının müavini Tofiq Yaqubluya Cinayət Məcəlləsinin 220.1-ci (zorakılıqların, talanların, yanğınların törədilməsi, əmlakın məhv edilməsi ilə müşayiət olunan kütləvi iğtişaşları təşkil etmə və ya belə iğtişaşlarda iştirak etmə) və 315.2-ci (hakimiyyət nümayəndəsinə zor tətbiq etmə və ya müqavimət göstərmə) maddəsi ilə ittiham irəli sürülüb. O, 2013-cü il yanvarın 23-də və 24-də İsmayıllıda baş vermiş aksiyalar zamanı ictimai qaydanı pozmaqda və vətəndaşları iğtişaşlara təhrik etməkdə təqsirləndirilib.
Məhkəmənin hökmü ilə Tofiq Yaqublu 5 il müddətinə azadlıqdan məhrum edilib.
Xəbərdən istifadə edərkən istinad etmək vacibdir.
