Avropa Şurası Parlament Assambleyasının Strasburqda keçirilmiş sessiyası çərçivəsində "Sumqayıt Gənclərinin Hüquqi Maarifləndirilməsi” ictimai birliyinin sədri, hüquq müdafiəçisi, "Yüksəliş naminə” qəzetininn baş redaktoru Elçin Məmməd Türkiyəli deputat, Cümhuriyyət Xalq Partiyasının sabiq sədri Dəniz Baykalla görüşüb. Onunla Türkiyədə yaxınlaşan parlament seçkiləri, ermənilərin saxta soyqırım iddiaları və ölkədə prezident hakimiyyətinin qurulması yönündə fikir mübadiləsi aparıb. CHP lideri partiyasının qeyd olunan məsələlərə münasibətini açıqlayıb. D.Baykalın sözlərinə görə, parlament seçkiləri Türkiyənin tarixində önəmli mərhələdir və uzun müddətli AKP hakimiyyətinin Türkiyənin bölünməsi siyasəti, korrupsiya hallarının çoxalması və regiona təsir gücünün azalması yönündəki fəaliyyətinə son qoyulmalıdır. "Türkiyə artıq federallaşmaq təhlükəsi ilə qarşı-qarşıyadır və kürd probleminin aradan qaldırılması istiqamətində atılan addımlar sadəcə cəfəngiyatdır. AKP hakimiyyətinin zəifləmiş xarici siyasətidir ki, bu gün ermənilər dünyaya saxta soyqırımlarını sırıya bilirlər. Ancaq Xocalı qətliamını isə özümüzdən başqa kimsə eşitmir. Bu gün Türkiyəni prezidentlik idarəçiliyinə sürükləməkdənsə, həllini gözləyən daha vacib məsələlər vardır.” – deyə CHP sabiq sədri bildirib. CHP-li deputat həmçinin, milli məsələlərimizdə Azərbaycan nümayəndə heyəti ilə birgə fəaliyyət göstərdiklərini və daha sıx əməkdşlıq etdiklərini bildirib.