Xəbər verdiyimiz kimi, Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyi (AYNA) Bakı-Sumqayıt yolunda avtobus zolağı çəkir.
Məlumata görə, ümumi istifadədə olan nəqliyyat vasitələri üçün xüsusi hərəkət zolaqlarının təşkili ilə bağlı tədbirlər davam etdirilir. Sumqayıt şəhərindən Bakı şəhəri istiqamətində təşkil edilmiş avtobus zolağının effektivliyi nəzərə alınaraq, eyni zamanda görülən işlərin davamı olaraq əks istiqamətdə də xüsusi hərəkət zolağının təşkili həyata keçirilir. Həmin yol sahəsində avtobus zolağının tələbinə uyğun nişanlanma xətləri çəkilir və müvafiq yol nişanları quraşdırılır.
Bəs, Bakı-Sumqayıt yolunda yeni çəkilmiş avtobus zolağında hazırda istismarda olan avtobuslar olacaq yoxsa yeni avtobuslar?
Məsələ ilə bağlı Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyi (AYNA) ilə əlaqə saxladıq. Qurumdan Xeberle.com-a verilən məlumata görə, marşrut xətləri üzrə nəqliyyat vasitələrinin yeniləməsi daim diqqətdə saxlanılır:
"Bakı-Sumqayıt yolunda təşkil edilmiş avtobus zolağında müntəzəm marşrut xətləri üzrə sərnişindaşımaları hazırda istismarda olan avtobuslarla həyata keçirilir. Eyni zamanda qeyd edək ki, bu və digər müntəzəm marşrut xətləri üzrə nəqliyyat vasitələrinin yeniləməsi daim diqqətdə saxlanılır və daşıyıcılar qarşısında bu məsələ qaldırılır”.
Elşən Yəhyayev
Xəbərdən istifadə edərkən istinad etmək vacibdir.
