Azərbaycanda qeyri-sabit hava şəraiti yaxın günlər ərzində fasilələrlə davam edəcək.
Bunu Modern.az-a açıqlamasında Milli Hidrometeorologiya Xidmətinin Hidrologiya Mərkəzinin direktoru Asif Verdiyev deyib.
Onun sözlərinə görə, may ayında hava şəraitinin qeyri-sabit keçməsi təkcə Azərbaycanda deyil, qonşu ölkələrdə də müşahid olunur:
"Ümumilikdə götürdükdə son 30 ildə ən soyuq may ayı 1999-cu ildə qeydə alınıb. Həmin vaxtdan sonra bu il may ayında belə qeyri-sabit hava şəraitini müşahidə edirik. Qeyri-sabit hava şəraiti nəticəsində bəzi yerlərdə leysan xarakterli yağışlar, dağlıq ərazilərdə qar yağması müşahidə olunur. Ölkəmizdə bu cür hava şəraiti yaxın günlər ərzində fasilələrlə davam edəcək. Hazırda Bakıda və Abşeron yarımadasında müşahidə olunan temperatur normadan 3 dərəcə aşağıdır. Bölgələrdə qeyri-sabit, yağıntılı hava şəraiti hələ yaxın 2-3 gün ərzində müşahidə olunacaq".
Asif Verdiyev növbəti günlərdə hava şəraitinin nisbətən normallaşacağını qeyd edib:
"Digər günlərdə Bakı və Abşeron yarımadasında ötən günlərlə müqayisədə nisbətən temperaturun yüksəlməsi müşahidə ediləcək. Dəyişkən buludlu, əsasən yağmursuz hava şəraiti proqnozlaşdırılır. Sonrakı günlərdə isə nisbətən mülayim cənub küləyi üstünlük təşkil edəcək. Havanın temperaturu 17-22 dərəcə arasında dəyişəcək”.
Xəbərdən istifadə edərkən istinad etmək vacibdir.
