Bakı-Sumqayıt yolunda baş verən yol-nəqliyyat hadisəsinin təfərrüatı məlum olub.
Baş Dövlət Yol Polisi İdarəsindən (BDYPİ) Oxu.Az-ın sorğusuna cavab olaraq bildirilib ki, hadisə dekabrın 29-da 03:00-da qeydə alınıb.
Bildirilib ki, hadisə Bakı-Sumqayıt yolunun 17-ci kilometrliyində baş verib:
"Bakı istiqamətində hərəkətdə olan 99-FP-276 dövlət nömrə nişanlı Nurlan Umudvar oğlu Əliyevin idarə etdiyi "Mercedes-Benz" markalı avtomobil idarəetməni itirərək işıq dirəyinə çırpılıb. Hadisə nəticəsində avtomobil və işıq dirəyi aşıb. Bu zaman eyni istiqamətdə hərəkətdə olan 19-AB-189 dövlət nömrə nişanlı, Samir Ənvər oğlu İsmayılovun idarə etdiyi MAN markalı nəqliyyat vasitəsi, həmçinin Rəhim Arzu oğlu Qədirlinin idarə etdiyi 99-UF-652 dövlət nömrə nişanlı "Opel" də aşmış işıq dirəyinə çırpılıb".
Xəbərdən istifadə edərkən istinad etmək vacibdir.
