Sumqayıt şəhərinin 13-cü mikrorayonunda — Üzeyir Hacıbəyov küçəsi, bina 4A-da yaşayan sakinlər ciddi narazılıq içindədir.
Şikayətçilərin Xeberle.com-a bildirdiyinə görə, naməlum şəxslər öz avtomobillərini binanın qarşısında park edərək yolun tam bağlanmasına səbəb olur. Nəticədə sakinlər nə binanın həyətinə daxil ola bilir, nə də öz avtomobillərini parklamağa yer tapırlar.
"Həyətimiz işğal olunub” – sakinlər narazıdır
Sakinlərin verdiyi məlumata görə, vəziyyət o qədər gərgindir ki, onlar məcbur qalıb nəqliyyat vasitələrini "Bravo” marketin ərazisində park etməli olurlar. Bu isə həm əlavə məsafə, həm də təhlükəsizlik baxımından ciddi narahatlıq yaradır.
Binanın yaxınlığında yerləşən şadlıq sarayına toya gələn şəxslərin də öz maşınlarını qanunsuz olaraq binanın həyətinə park etməsi problemi daha da dərinləşdirir. Sakinlərin sözlərinə görə, toydan sonra içkili şəxslər binanın həyətində qeyri-etik ifadələrlə onları narahat edir.
Qanunsuz parklanma və səs-küy: nəzarət niyə yoxdur?
Sakinlər bildirir ki, dəfələrlə müvafiq qurumlara müraciət olunsa da, hələlik heç bir ciddi tədbir görülməyib. Ərazidə nə yol hərəkəti qaydalarına, nə ictimai asayişə nəzarət olunur.
Müşahidələrə görə, yeni açılan şadlıq sarayının qonaqları üçün ayrılmış xüsusi parklanma yeri yoxdur. Buna görə də yaxınlıqda yaşayan sakinlər sanki hər axşam sərnişin axınının və səs-küyün mərkəzində qalırlar.
Sakinlər aidiyyəti qurumlardan tədbir gözləyir
Şikayətçilər rəsmi qurumlardan — xüsusilə polis və bələdiyyə orqanlarından — ərazidə reyd keçirilərək qanunsuz parklanmanın qarşısının alınmasını, həmçinin şadlıq sarayına ayrı parklama zonası ayrılmasını tələb edir.
Sakinlərin fikrincə, məsələ operativ şəkildə həll olunmasa, mikrorayonun gündəlik həyatı bir müddət də belə davam edəcək və problem daha da gərginləşəcək.
Xeberle.com
Xəbərdən istifadə edərkən istinad etmək vacibdir.
