Bir müddətdir ki, ölkənin ən böyük şəhərlərindən biri olan Sumqayıtda sahibsiz itlərin həddən artıq çoxaldığı barədə şəhər sakinlərinin saysız-hesabsız şikayətlərini işıqlandırmışıq. Sürü halında mikrorayonlarda, binaların həyətində, parklarda, küçələrdə, ictimai yerlərdə itlərin əlindən nəinki, məktəblilər, hətta böyüklər də çəkinir.
Vətəndaşlara küçə itlərinin olduğu, dolaşdığı yerlərdən mümkün qədər uzaq durmağı məsləhət görürülər, amma bu da çıxış yolu deyil. Artıq vəziyyət o yerə çatıb ki, Sumqayıtın simvoluna çevrilmiş "Göyərçin" abidəsinin ətrafı da sahibsiz itlərin "sığınacaq” yerinə çevrilib.
Məlum məsələdir ki, abidənin dünyada analoqu yoxdur. "Sülh göyərçini” öz əsrarəngiz gözəlliyi ilə sakinləri də özünə cəlb edir. Onun yerləşdiyi Nəsimi parkı insanların görüş məkanına çevrilib. Hətta, şəhərimizin qonaqları "Sülh göyərçini”nin fonunda xatirə şəkilləri çəkdirirlər.
Təəssüf ki, hazırki xoşagəlməz mənzərə "Sülh göyərçini”ni sahibsiz itlərin əsirinə çevirib. Sahibsiz itlərin abidənin ətrafına toplaşması səbəbindən nə şəhərimizin qonaqları, nə də sakinlər abidəyə yaxınlaşa bilmir. Abidənin ətrafında sürü halında yatan sahibsiz itlər gecə vaxtı daha təhlükəli və aqressiv olurlar. Hazırda şəhər "Sülh göyərçini”mizin küçə itlərinin mühasirəsində qaldığını desək heç də yanılmarıq.
Sahibsiz itlərlə bağlı mövzunu dəfələrlə işıqlandırmağımıza baxmayaraq, bu günə kimi aidiyyəti orqanlar tərəfindən heç bir tədbir görülməyib. Gənclər şəhərimizdə sahibsiz itlər azalmaq əvəzinə, günü-gündən artır...
Xeberle.com-un əməkdaşının çəkdiyi fotoları təqdim edirik:
Elşən Yəhyayev
Xəbərdən istifadə edərkən istinad etmək vacibdir.
