Abşeron-Xızı Regional Mədəniyyət İdarəsinə tabeli Sumqayıt Dövlət Rəsm Qalereyasının təşkilatçılığı və Mədəniyyət İşçiləri Həmkarlar İttifaqı Sumqayıt şəhər Komitəsinin dəstəyi ilə ilə Sumqayıt şəhər Heydər Əliyev Mərkəzində Ümummilli Lider Heydər Əliyevin 100 illik yubileyinə həsr olunmuş «Heydər Əliyevin şah əsəri - Müstəqil Azərbaycan» adlı sərgi-tədbir təşkil edilib.
Sərgidə ümumilikdə 30 sənət adamının 70-dən çox rəsm, əl işləri və xalq-tətbiqi sənət nümunələri nümayiş olunub.
Sərginin keçirilməsində əsas məqsəd peşəkar və gənc rəssamların, xalq-tətbiqi sənət ustalarının yaradıcılığı ilə yaxından tanış olmaq və yetişməkdə olan gənc nəsillərə təbliğ etməkdir.
Sərgidə əməkdar jurnalist, yazıçı-publisist Eyruz Məmmədov, Türkiyədən gələn qonaq, Beynəlxalq Suluboya Cəmiyyətinin təsisçisi və prezidenti Atanur Doğan, ADPU təsviri incəsənət və onun tədrisi texnologiyası kafedrasının müdiri, pedaqoqika üzrə fəlsəfə doktoru, dosent Yeganə Cəlilova, "Dostlar” klubunun üzvləri - Mayıl Tağıyev, Rafiq Mehdiyev, Sumqayıt Dövlət Rəsm Qalereyasının direktoru Ellada Həsənova, ziyalılar, rəssamlar və dekorativ tətbiqi sənət ustaları iştirak ediblər.
Öncə müasir Azərbaycan dövlətçiliyinin banisi Heydər Əliyevin və şəhidlərin xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib. Sərgi-tədbirdə Eyruz Məmmədov, Yeganə Cəlilova, Atanur Doğan çıxış edərək böyük zəka sahibi, görkəmli dövlət xadimi, qüdrətli diplomat Heydər Əliyevin Azərbaycan mədəniyyətinə, ədəbiyyatına, incəsənətinə göstərdiyi əlahiddə qayğıısından danışıblar. Qeyd olunub ki, mədəniyyətimizin elə bir sahəsi yoxdur ki, Heydər Əliyev qayğısından bəhrələnməsin. Musiqimiz də, teatrımız da, kino sənətimiz də, heykəltaraşlıq və rəssamlığımız da, xalça sənətimiz də bugünkü inkişafında Ulu Öndərin çox dəyərli ideyalarından bəhrələnib.
Sumqayıt Dövlət Rəsm Qalereyasının direktoru Ellada Həsənova sərgidə iştirak edən rəssam və sənətkarlara hədiyyə və təşəkkürnamələr təqdim edərək onlara uğurlar arzulayıb.
Sərgidə həmçinin Ə. Bakıxanov adına 1 saylı uşaq incəsənət məktəbinin tar müəllimi Taleh Novruzov, S. Rüstəmov adına 3 saylı uşaq incəsənət məktəbinin müəllimləri Lyudmila Əliyeva, Violetta Həsənəlizadənin və Natavan Sadiqovanın şagirdləri musiqi proqramı ilə çıxış ediblər.
İlhamə Məhəmmədqızı
Xəbərdən istifadə edərkən istinad etmək vacibdir.
