Sumqayıt Regional Vəkil Bürosunun vəkili Elşad  İsayev Xeberle.com-a açıqlama verərək bildirmişdir ki, hüquqlarını müdafiə etdiyi vətəndaş Məmmədov Ramin Rza oğlu 09 oktyabr 2023-cü il tarixdə idarə etdiyi avtomobillə  Sumqayıt şəhərindən Saray qəsəbəsinə doğru hərəkət edərkən polis əməkdaşları tərəfindən saxlanılıb.

Vəkil bildirib ki, hüquqlarını müdafiə etdiyi vətəndaş qanun pozuntusuna yol vermədiyi halda ŞPİ-nin DYP şöbəsinin əməkdaşları tərəfindən saxlanılmış və onun spirtli içki qəbul edib etmədiyini dəqiqləşdirmək üçün bölməyə aparılmış və bir neçə saat orada saxladıqdan sonra Sumqayıt Şəhər Məhkəməsinə gətirmişlər.

Məhkəmədə YPX əməkdaşları və hadisə yerində olmayan bir şahid dindirilmiş, lakin onun əməlində inzibati xətanın tərkibi olmadığına görə,  Məhkəmənin qərarı ilə onun barəsində iş üzrə icraata xitam verilmişdir.  

Eyni zamanda məhkəmə yalan ifadə verən şahid barəsində Sumqayıt şəhəri üzrə İcra İdarəsinə rəsmi məlumat göndərmiş və hal şahidi Kərimov Sabir Mirseyib oğlunun barəsində Azərbaycan Respublikası İXM-nin 530-cu maddəsi ilə inzibati xəta haqqında protokol tərtib edilərək, baxılması üçün Sumqayıt Şəhər Məhkəməsinə göndərilmişdir. Beləliklə o, şahid kimi yalan ifadə verdiyini etiraf etmiş və  Məhkəmənin  qərarı ilə Kərimov Sabir Mirseyib oğlu qeyd olun maddə ilə təqsirli bilinib, 250 manat məbləğində inzibati cərimə edilmişdir.